OKMK: Yangi texnologiya asosida 96 % kobalt ajratib olindi

1 Rasm. Kobalt chiqindilari

Olmaliq kon-metallurgiya kombinatida ilm-fan va ishlab chiqarish integratsiyasi tufayli ko‘plab yutuqlarga erishilmoqda. Jumladan, kombinatning Nodir metallar va qattiq qotishmalar ishlab chiqarish birlashmasi qoshidagi o‘zbek-koreys ilmiy texnologik markazi mutaxassislari tomonidan volfram tarkibli chiqindilardan 96% kobaltni ajratib olishga erishildi. Volfram chiqindilaridan ajratib olingan kobalt metallini qayta ishlab chiqarishga jalb qilish bo‘yicha anchadan buyon samarali ishlar olib borilmoqda. 

2 Rasm.Kobalt namunalari 

Kobalt asosan metallardan kesuvchi asboblar tayyorlashda ularning yemirilishga bardoshli va chidamliligini oshirishda muhim ahamiyat kasb etadi. Shu bois yangi texnologiya asosida ajratib olinadigan kobaltdan metallarga ishlov berish uchun kesuvchi asboblar tayyorlanib, ishlab chiqarish jarayonlariga jalb qilish asosiy maqsad qilib qo‘yilgan.

3 Rasm. Kesuvchi asboblar

Shu o‘rinda ta’kidlash joizki, ayni paytda dunyo bozorida kobaltga bo‘lgan talab taklifdan kamida 10% oshib bormoqda, ya’ni yetmagan kobalt miqdori chiqindilardan ajratib olinmoqda.

Kobalt va uning birikmalari sanoatning turli sohalarida qo‘llaniladi. Masalan, radio-texnika, rangli metallurgiya, po‘lat qotishmalar tayyorlashda, litiy ion batareyalarning elektrodlari va katalizatorlar. E’tiborlisi, respublikamizda kobalt 100% import mahsulot xisoblanadi. Taxminlarga ko‘ra, 2030 yilga kelib, dunyoda birinchi ishlab chiqarilgan elektromobillar eskira boshlaydi. Shunda ushbu batareyalarni qayta saqlash, qayta ishlash hamda kobalt metallini ajratib olish yanada dolzarb masala bo‘lib qoladi. Ishlab chiqilgan yangi texnologiya, kelajakda elektromobillarning, smartfonlarning ishdan chiqqan litiy akkumulyatorlaridan kobaltni ajratib olishga qo‘llanilishi uchun poydevor bo‘lib xizmat qiladi va eng muhimi atrof-muhitni himoya qilishda keng qo‘llaniladi. Bir so‘z bilan aytganda, volframli qattiq qotishmalar ishlab chiqarish sohasida chiqindisiz texnologiya yaratishda muhim omil bo‘lib xizmat qiladi. Hozirgi kunda sinov jarayonlarini muvaffaqiyatli o‘tkazishga erishildi va ishlab chiqarishga joriy qilindi.

Reklama huquqi asosida