Oq uy Tramp prezidentligining ikkinchi 100 kunligi uchun reja tayyorlayapti – “Reuters”

Kelgusi hafta ikkinchi muddatining dastlabki 100 kunini nishonlaydigan AQSH Prezidenti Donald Tramp jamoasi yaqin 100 kunlik rejani hozirdan tayyorlamoqda. Bu haqda Oq uy rasmiylariga tayanib “Reuters” xabar berdi.

Tramp kelasi hafta Michigan shtatiga 100 kunlik miting uchun tashrif buyurishni rejalashtirmoqda. Tadbir davomida Tramp jamoasi o‘zining iqtisodiy qarashlari, noqonuniy muhojirlarga nisbatan radikal siyosati, tashqi siyosatdagi o‘zgarishlar va milliarder Ilon Mask boshchiligidagi Hukumat samaradorligi departamenti (DOGE) ishini yoritish niyatida.

Kelgusi 100 kun ichida Tramp ma’muriyati bir necha mamlakatlardan sayohat qilishni taqiqlash va savdo bitimlari va tinchlik muzokaralariga urg‘u berish bo‘yicha sa’y-harakatlarni kuchaytirishni rejalashtirmoqda.

Rasmiylardan biri Trampning zaxirada yana bir nechta “suvosti torpedalari” borligini aytgan, biroq u nima haqida gapirayotganini tushuntirmagan.

Agentlikka ko‘ra, Trampning rejalari haqida e’lon qilinishi uning navbatdagi muddatini ilgari surish bo‘yicha kengroq kampaniyaning bir qismi bo‘ladi, Oq uy mulozimlaridan biri o‘z ismini oshkor qilmaslik sharti bilan buni “konservativ fantaziya” deb ta’riflagan.

“Tramp rasmiylari uning Amerika jamiyatini qayta qurish harakatlari tezligi va ko‘lamini olqishlasa-da, tanqidchilar u fuqarolar va fuqaroligi bo‘lmaganlar huquqlarini oyoqosti qilgan, ittifoqchilarni begonalashtirgan va AQSHning dunyodagi hukmronligiga tahdid solganini aytishadi”, deyiladi nashrda.

Jurnalistlarning eslashicha, 2025 yilning yanvarida ikkinchi marta Oq uyda lavozimga kirishganidan so‘ng, Tramp “antisemitizm xatti-harakatlariga toqat qilgani uchun” ba’zi universitetlarni hukumat tomonidan moliyalashtirishni to‘xtatgan, federal hukumat va federal pudratchilar bilan xilma-xillik, tenglik va inklyuziya (DEI) dasturlarini bekor qilgan va boshqa bir qator qarorlar qabul qilgan.

“Bu butun AQSH jamiyatiga sezilarli ta’sir ko‘rsatdi”, deb yozadi “Reuters”.

Oq uy rasmiylaridan biri oldinda Trampning dastlabki 100 kunidagi jiddiy harakatlar yana kuzatilishini aytgan.

Eslatib o‘tamiz, avvalroq AQSH Prezidenti Donald Tramp Rossiya rahbari Vladimir Putinning Ukrainadagi urushni tugatish istagiga shubha bildirgani xabar qilingandi.