Nikohdan o‘tishda FHDYOga elektron ariza berish mumkin

Davlat xizmatlar agentligi nikohni qayd etish uchun FHDYOga elektron ariza namunasini taqdim etmoqda. Ariza berilganidan so‘ng, qonunchilikda keltirilgan muddat – 1 oy mobaynida xizmat ko‘rsatiladi.

Xizmatga ko‘ra, nikoh tuzilganligini ro‘yxatdan o‘tkazish haqidagi arizani olishda FHDYO organlari tomonidan nikoh tuzayotgan shaxslarga tibbiy tekshiruvdan o‘tish uchun yo‘llanmalar beriladi. Tibbiy tekshiruv shifokorlar, psixiatrlar, narkologlar, dermato-venerologlar, ftiziatrlar (dispanserlar va tuman kabinetlarida) tomonidan yashash joyi bo‘yicha bepul ravishda shaxslarning tibbiy muassasaga murojaat etgan kundan e’tiboran 2 haftadan ko‘p bo‘lmagan muddatda o‘tkaziladi.

Xizmat ko‘rsatish narxi bazaviy hisoblash miqdorining 20 foizi etib belgilangan – 44 600 so‘m (2020 yil 21 aprel holatiga).

Maxsus portalda murojaat qilingan arizalar statistikasi ham keltirib o‘tilgan. Unga ko‘ra, jami arizalar soni 84 ta bo‘lib, bundan 64 tasi rad etilgan. Arizalarning 4 tasi tugallanib bo‘lgan va 13 tasi ayni vaqtda jarayonda ekani ko‘rsatib o‘tilgan.

Ushbu xizmatdan foydalanish uchun Yagona interaktiv davlat xizmatlari portaliga yagona identifikatsiya tizimi (OneID) orqali kirish kerak bo‘ladi.