Neymar koronavirusga chalindi

Braziliyada joylashgan San-Paulu shahrining “Santos” klubi vingeri Neymarda COVID-19 infeksiyasi aniqlandi. Bu haqda “O Globo” xabar berdi.

Ma’lum qilinishicha, futbolchining kasalligi klubda qolishi mavhum bo‘lib turgan bir paytda aniqlangan va u infeksiya tufayli jamoaning mashg‘ulotlarida ishtirok eta olmayapti.

Neymarning COVID-19’ga topshirgan testi ijobiy chiqqan. “Santos” klubi ham 7 iyun kuni futbolchining sog‘lig‘i haqidagi holatni e’lon qilgan.

“5 iyun kuni boshlangan virusli infeksiya sababli futbolchi Neymar “Santos” futbol klubining tibbiy bo‘limi ko‘rigidan o‘tkazildi va laboratoriya tahlillari COVID-19 infeksiyasini tasdiqladi. Futbolchi alomatlar paydo bo‘lgan paytdan boshlab faoliyatdan chetlatilgan, hozirda u uyida dam olmoqda va shifokor ko‘rsatmasiga binoan simptomatik davolanmoqda”, deyiladi klub bayonotida. 

Qayd etilishicha, 5 iyun kunidan beri Neymar mashg‘ulotlarda qatnashmayapti. Endilikda u tibbiy bo‘lim ruxsatini kutmoqda, shunda faoliyatini cheklovsiz davom ettirishi mumkin bo‘ladi. 

Bu sog‘liq muammosi Neymar uchun noaniqliklar davrida yuz bergan. Uning “Santos” klubi bilan amaldagi shartnomasi 30 iyun kuniga qadar amal qiladi, ammo hozircha shartnomani uzaytirish bo‘yicha tomonlar o‘zaro kelishuvga erishmagan.

Eslatib o‘tamiz, avvalroq “Santos” klubi vingeri Neymar jarohat olgandi va Braziliya terma jamoasining mart oyidagi yig‘inlari uchun qaydnomasidan chiqarilgandi.