“Neftchi” O‘zbekiston terma jamoasi a’zosini o‘z safiga qo‘shib oldi

Farg‘onaning “Neftchi” klubi qishki transferlar oynasida himoyachi Farrux Sayfiyev va darvozabon Eldor Suyunov bilan shartnoma imzoladi. Bu haqda klub matbuot xizmati xabar berdi.

Manbaga ko‘ra, farg‘onaliklar yangi mavsum oldidan tarkibni sezilarli darajada kuchaytirishni maqsad qilgan. Klub shuning uchun bir qator nomdor futbolchilar bilan safini kuchaytirishda davom etadi.

Hozirga kelib farg‘onaliklar Abror Ismoilov, Vladimir Yovovich, Zoran Marushich, Yovan Jokich, Muhammadali G‘iyosov, Ikrom Aliboyev va Shohruh Gadoyev kabi futbolchilarni o‘z safiga qo‘shib oldi.

Ma’lumot o‘rnida, Sayfiyev faoliyati davomida “Neftchi”ga qadar “Mash’al“, “Nasaf“, “Paxtakor“, “Navbahor“ kabi klublarda to‘p tepgan. U o‘tgan mavsumni namanganliklar safida o‘tkazdi. 33 yoshli himoyachining narxi “Transfermarkt” portalida 350 ming yevroga baholangan.

Eldor Suyunov esa “Nasaf”, “Paxtakor”, “Navbahor” klublarida faoliyat olib borgan. U ham o‘tgan mavsumni Namangan jamoasida o‘tkazdi. 33 yoshli darvozabonning narxi “Transfermarkt” portalida 50 ming yevro etib belgilangan.