NBA. Amaldagi va sobiq chempionlar o‘zaro kuch sinashdi

Kecha, 8 fevral oqshomida NBA muntazam chempionatining bu mavsumida eng ko‘p ochko, eng ko‘p assist, eng ko‘p reband (halqadan qaytgan to‘pni egallab olish), eng ko‘p blokshot qayd etgan  basketbolchilar parketga chiqishdi.

Lebron Jeyms ijtimoiy tarmoqlarda jamoadoshi Uestbrukni qo‘llab chiqqan postida "Jamoadagi muammolar bir kishiga tegishli emas, bu umumiy tarix", deb aytganidan ham bilish mumkin-ki "Lakers"da bu yil ishlar yaxshi emas.

Sobiq chempionlar Los-Anjeles shahrida amaldagi chempionlar "Baks" jamoasini qabul qilishdi. 116:131 hisobida mag‘lubiyatga uchragan gollivudliklar jadvalda 9-o‘rinda bormoqda. Bahsning eng yaxshi o‘yinchisi esa 44 ochko, 14 reband, 8 assist qayd etgan Yannis Adetokunbo bo‘ldi. 

Tanasida yig‘ilgan yog‘lar hisobiga qishdan chiqib oladigan ayiqdek avvalgi g‘alabalari evaziga "yashab kelayotagan" "Nets" Bruklin shahridagi "Barklays Sentr" arenasida  "Seltiks"ni qabul qildi. Uchrashuvda 126:91 hisobida Bostondan kelgan basketbolchilar g‘alaba qozondi. 

Bruklinliklar yetakchisi Kevin Dyurant 16 yanvarda jarohat olgandi. Shundan beri 12 o‘yin o‘tkazgan "Nets" 10 mag‘lubiyat va 2 g‘alabaga erishdi. So‘nggi o‘yinlardagi omadsizliklarga qaramay bruklinliklar jadvalda pley-offga chiqish imkonini beruvchi o‘rinda ketmoqda. 22 ochko, 9 assist va 7 reband to‘plagan Jeylin Braun eng yaxshi o‘yinchiga aylandi.

Filadelfiya shahrida "Siksers" jamoasi g‘arbiy konferensiya yetakchisi "Sans"ni qabul qildi. 114:109 hisobida g‘alaba qozongan finiksliklar yana to‘rtta g‘alabaga erishsa, play-off yo‘llanmasini qo‘lga kiritgan birinchi jamoa bo‘ladi. 35 ochko, 3 assist hamda 4 reband natijasiga ega Devin Buker bahsning eng yaxshi o‘yinchisiga aylandi.  

"Xoks" jamoasi Indiana shahridan tashrif buyurgan "Peysers" jamoasini qabul qildi va 133:112 hisobida g‘alaba qozondi. Atlantaliklar pley-offga yo‘llanma beruvchi eng so‘nggi o‘rinda ketmoqda. Ular uchun har o‘yin finalga aylanishi tayin. Trey Yang 34 ochko va 11 assist natijasi bilan eng yaxshi o‘yinchiga aylandi. 

Kechagi kun bahslarida yana 6 uchrashuv bo‘lib o‘tdi. Undagi natijalarni quyida bilib olishingiz mumkin:

 “Grizzlis”  – “Klippers” 135:109;
 “Pelikans”  – “Rokets” 110:97;
“Maveriks” – “Pistons” 116:86;
“Naggets” – “Niks” 132:115;
“Treyl Bleyzers”  – “Mejik” 95:113;
“Kings” – “Timbervulvs” 114:134.

Navro‘zbek Mamaziyoyev