Namanganda o‘quvchilar mudhish YTH sodir etdi (video)

Joriy yilning 2 oktyabr kuni Namangan viloyatida maktab va texnikum o‘quvchilari boshqaruvidagi Gentra hamda yuk mashinasi o‘rtasida dahshatli yo‘l-transport hodisasi sodir bo‘ldi. Bu haqda viloyat Yo‘l harakati xavfsizligi boshqarmasi xabar berdi.

Ma’lum qilinishicha, YTH soat 11:00 da viloyatning Namangan shahri Marg‘ilon ko‘chasida Gentra avtomobili va “ZIL” rusumli yuk mashinasi ishtirokida sodir bo‘lgan. 5 nafar maktab va texnikum o‘quvchilari tomonidan ijaraga olingan Gentra mashinasini boshqarib borayotgan voyaga yetmagan haydovchi hushyorlikni yo‘qotib, yo‘lning o‘rtasini ajratib turuvchi beton to‘siqdan oshib, qarama-qarshi tomondan harakatlanib kelayotgan “ZIL” bilan to‘qnashgan. Oqibatda Gentra ichida bo‘lgan jabrlangan yo‘lovchilar Respublika shoshilinch tez-tibbiy yordam ilmiy markazining Namangan filiali jonlantirish bo‘limiga yotqizilgan.

Biroq haydovchi olgan jarohatlari tufayli shifoxonaga yetmasdan vafot etgan. Jabrlanuvchilarning qolgan 4 nafari (3 nafari 17 yosh, bir nafari esa 15 yosh) ham og‘ir holatda jonlantirish bo‘limida qolmoqda.

Eslatib o‘tamiz, avvalroq Samarqand viloyatida sodir bo‘lgan yo‘l-transport hodisasi oqibatida 3 kishi vafot etdi. Urgut tumani “Xo‘jaguzar” MFY hududidan o‘tuvchi “Urgut-G‘o‘s-Avazmergan” avtomobil yo‘lining 5-kilometrida 2003 yilda tug‘ilgan Sobalt rusumli avtomobil haydovchisi “Urgut-G‘o‘s” yo‘nalishi bo‘ylab harakatlanayotgan vaqtda rul boshqaruvini yo‘qotgan va yo‘lning qarama-qarshi yo‘nalishida harakatlanib kelayotgan 1991 yilda tug‘ilgan haydovchi boshqaruvidagi Damas rusumli avtomobil bilan to‘qnashgan.