Namanganda 14 yoshli bola mashinada o‘z tengdoshini urib ketdi

Namanganda 14 yoshli yigit "VAZ-2106" rusumli avtomobilda o‘zining tengdoshini urib yubordi. Bu haqda Ichki ishlar vazirligi Jamoat xavfsizligi departamenti Yo‘l harakati xavfsizligi xizmati xabar berdi. 

Qayd etilishicha, hodisa joriy yilning 20 may kuni soat 14:45 da Kosonsoy tumani “Kushon” MFY Hurriyat ko‘chasida sodir bo‘lgan. 

2008 yilda tug‘ilgan bola (tumandagi 5-sonli maktabning 7-sinf o‘quvchisi) "VAZ-2106" rusumli avtomobilda harakatlanib ketayotganda, boshqaruvni yo‘qotishi oqibatida yo‘lning o‘ng chetida ketayotgan piyoda, 2008 yilda tug‘ilgan X.B.ni urib yuborgan.

Yo‘l-transport hodisasi oqibatida piyoda X.B. og‘ir tan jarohatlari olib, shifoxonada vafot etgan.

Mazkur YTH yuzasidan Kosonsoy tumani Ichki ishlar bo‘limi huzuridagi Tergov bo‘limi tomonidan O‘zbekiston Respublikasi Jinoyat kodeksining 266-moddasi 2-qismi bilan jinoyat ishi qo‘zg‘atilib, hozirda tergov harakatlari olib borilmoqda.