Murodjon Ahmadaliyevning navbatdagi raqibi va jang sanasi ma’lum bo‘ldi
Sport
−
27 aprel 2022 9337
"Mir boksa" kompaniyasi o‘zbekistonlik bokschi Murodjon Ahmadaliyevning navbatdagi jangini rasman tasdiqladi.
Unga ko‘ra, yarim yengil vaznda WBA va IBF yo‘nalishlari chempioni Murodjon Ahmadaliyev joriy yilning 25 iyun kuni AQSHning Texas shtati San-Antonio shahrida ringga ko‘tariladi. “Kaka” shu kuni o‘zining WBA kamariga rasmiy da’vogar, amerikalik Ronni Riosdan chempionlik unvonini himoya qiladi.
Murodjon shu kungacha professional boksda 10 ta jangda ishtirok etgan va barcha janglarida zafar quchgan. Shularda 7 tasi nokaut evaziga qo‘lga kiritilgan.
“Kaka”ning professional boksdagi faoliyati 2018 yil 10 mart kuni boshlangan. O‘sha kuni Ahmadaliyev birinchi raunddayoq argentinalik bokschi David Paz ustidan nokaut evaziga g‘alaba qozongan edi.
O‘zbekistonlik bokschining chinakam yulduzlik onlari 2020 yilning 30 yanvar kuni amerikalik Daniel Romanning ustidan qozonilgan g‘alabadan so‘ng boshlandi. Ushbu jangdan keyin, Murodjon yarim yengil vazn toifasida WBA, IBF chempionlik kamarlarini qo‘lga kiritdi.
Ahmadaliyev oxirgi ikkita jangida Ryosuke Ivasa va Joze Velaskesni mag‘lub etib chempionlik unvonini munosib himoya qildi. Ronni Riosga qarshi to‘qnashuv Murodjon uchun uchinchi himoya jangi bo‘ladi.
Ma’ruf Abdumalikov
Live
Barchasi
