Mirziyoyev Saudiya Arabistoniga yetib bordi

Prezident Shavkat Mirziyoyev bugun, 11 noyabr kuni amaliy tashrif bilan Ar-Riyod shahriga bordi. Bu haqda Prezident matbuot xizmati xabar berdi.

Podshoh Xolid nomidagi xalqaro aeroportda davlat rahbarini Ar-Riyod viloyati rahbariyati – shahzoda Muhammad bin Abdurahmon bin Abdulaziz va boshqa rasmiy shaxslar kutib oldi.

Tashrif dasturiga muvofiq, Mirziyoyev bugun Ar-Riyod shahrida G‘azo va Livandagi vaziyatning keskinlashuvi hamda Yaqin Sharqdagi mojaroga tez fursatda yechim topish choralarini ishlab chiqishga bag‘ishlangan navbatdan tashqari Arab-islom sammitida ishtirok etadi va nutq so‘zlaydi.

Tadbirda ushbu hududlardagi keskinlikni tez fursatda kamaytirish, mojaroni siyosiy-diplomatik yo‘l bilan hal etish masalalari ko‘rib chiqiladi.

Eslatib o‘tamiz, avvalroq Saudiya Arabistoni Podshohi Salmon bin Abdulaziz Ol Saudning taklifiga binoan Mirziyoyev Saudiya Arabistoniga jo‘nab ketgani xabar qilingandi.