Mirziyoyev BMT sessiyasida 9 ta global mavzuga qaratilgan tashabbuslarni ilgari suradi

Ertaga, 21 sentyabr kuni O‘zbekiston Respublikasi Prezidenti Shavkat Mirziyoyev Birlashgan Millatlar Tashkiloti Bosh Assambleyasi 76-sessiyasining yuqori darajadagi umumsiyosiy munozaralarida videomurojaat bilan so‘zga chiqishi haqida xabar bergandik.

Prezident Matbuot xizmati Shavkat Mirziyoyevning BMT sessiyasida qiladigan videomurojaati yuzasidan batafsil axborot berdi.

Unga ko‘ra, davlat rahbari xalqaro hamjamiyatga mintaqa va global kun tartibidagi dolzarb masalalar, BMTning zamonaviy tahdid va xatarlarga qarshi birgalikda chora ko‘rishdagi roli yuzasidan o‘z nuqtai nazarini taqdim etadi hamda Yangi O‘zbekistonni barpo etish yo‘lida amalga oshirilayotgan va ortga qaytmas tus solgan chuqur demokratik islohotlarning mazmun-mohiyatini ochib beradi.

O‘zbekiston yetakchisining nutqida, muhokamalarning mavzusini hisobga olib, COVID-19 pandemiyasining ijtimoiy-iqtisodiy oqibatlarini BMT tomonidan e’lon qilingan “hech kimni ortda qoldirmaslik” prinsipi asosida birgalikda yengib o‘tish masalalariga to‘xtalib o‘tiladi.

O‘zbekiston Respublikasi Prezidenti tinchlik va xavfsizlikni mustahkamlash, jahon iqtisodiyotini tiklash, barqaror taraqqiyotni ta’minlash, mintaqada va global darajada muloqotni kengaytirish, inson huquq va erkinliklarini ilgari surishga, shuningdek, iqlim o‘zgarishi, atrof-muhit va biologik xilma-xillikning tanazzulga yuz tutishi, Orol dengizining qurishi kabi transmilliy tahdidlarga qarshi kurashishga qaratilgan qator muhim tashabbuslarni ilgari surishi kutilmoqda.

Davlat rahbarining 2020 yil sentyabr oyida o‘tgan BMT Bosh Assambleyasi 75-sessiyasidagi nutqida ilgari surilgan barcha tashabbuslar xalqaro hamjamiyat tomonidan keng qo‘llab-quvvatlangani va bugun o‘zining amaliy ifodasini topayotganini ta’kidlash lozim.

Ularni amalga oshirish doirasida, jumladan, pandemiyaga qarshi samarali kurashish borasidagi chora-tadbirlar qo‘llab-quvvatlanmoqda. O‘zbekiston Respublikasi tomonidan Pandemiya davrida davlatlarning ixtiyoriy majburiyatlari to‘g‘risida kodeks ishlab chiqilgan bo‘lib, bu boradagi global sa’y-harakatlarga mamlakatning hissasi sifatida BMT Bosh Assambleyasi tomonidan rasmiy hujjat shaklida tarqatildi.

2021 yil may oyida BMT Bosh Assambleyasi Orolbo‘yini ekologik innovatsiyalar va texnologiyalar hududi, deb e’lon qilish to‘g‘risida maxsus rezolyutsiyani qabul qildi. BMT shafeligida tashkil etilgan Orolbo‘yi mintaqasi uchun Inson xavfsizligi bo‘yicha ko‘p tomonlama sheriklik trast jamg‘armasi samarali faoliyat yuritmoqda.

O‘tgan haftada YUNESKO bilan hamkorlikda Xiva shahrida “Markaziy Osiyo jahon sivilizatsiyalari chorrahasida” xalqaro madaniyat forumi muvaffaqiyatli tashkil etildi.

2021 yil noyabr oyida Toshkent shahrida BMTning Global aksilterror strategiyasini amalga oshirish bo‘yicha Markaziy Osiyo davlatlarining Qo‘shma harakatlar rejasini bajarish natijalari va bu boradagi hamkorlik istiqbollariga bag‘ishlangan xalqaro konferensiyani o‘tkazish rejalashtirilgan.