Meyveyzer va Kardashian kriptovalyuta firibgarligida ayblanmoqda

Professional boksning besh vazn toifasida sobiq jahon chempioni Floyd Meyveyzer boshqa mashhur shaxslar kriptovalyuta firibgarligida ayblanmoqda.

Joriy yilning 7 yanvar kuni AQSHning Kaliforniya shtati markaziy okrugi sudiga berilgan da’voga ko‘ra, Meyveyzer, Kim Kardashian va NBA'ning sobiq hujumchisi Pol Pirs o‘z muxlislarini “EthereumMax” tokenlarini sotib olishga ishontirgan.

Da’voga ko‘ra, bu kriptovalyuta narxini sun’iy ravishda oshirib, yulduzlarga o‘z ulushlarini sotishga imkon bergan. So‘ngra kriptovalyutaning qiymati tushirilgan va shu tariqa foydalanuvchilar daromaddan “quruq qolishgan”.

Shuningdek, Meyveyzer 2021 yil 6 iyun kuni Logan Pol bilan ko‘rgazmali jangi oldidan ushbu kriptovalyuta kompaniyasini bir necha bor targ‘ib qilgan.

2021 yil 26 may kuni esa “EthereumMax” Meyveyzer – Pol bellashuvining onlayn chipta xaridorlari uchun kriptovalyutaning yagona shakli ekanligi e’lon qilingan edi. Sayt chipta xaridorlariga Meyveyzerning jangdan keyingi intervyusida qatnashish imkoniyatini ham va’da qilgan.