Messining otasi vafot etdi – OAV

Argentina terma jamoasi hujumchisi Lionel Messining otasi Xorxe Messi 69 yoshida Argentinaning Rosario shahrida vafot etdi. Bu haqda “Infobae” nashri xabar berdi.

Manbaga ko‘ra, u uzoq vaqt davomida og‘ir kasallik bilan kurashgan va shahar shifoxonalaridan birida olamdan o‘tgan.

Xorxe Messi nafaqat Lionelning otasi, balki uzoq yillar davomida uning agenti sifatida ham faoliyat yuritgan. U 8 karra “Oltin to‘p” sohibi bo‘lgan futbolchining professional faoliyati shakllanishida muhim rol o‘ynagan.

Lionel “Nyuells Old Boyz” akademiyasida tahsil olayotgan paytda Xorxe o‘g‘lining o‘sish gormoni yetishmovchiligi bilan bog‘liq davolanishini ta’minlash uchun harakat qilgan. Keyinchalik u Messining Ispaniyaga ko‘chib o‘tishida ham muhim rol o‘ynagan.

Natijada “Barselona” 13 yoshli argentinalik futbolchini o‘z akademiyasiga qabul qilishga rozi bo‘lgan va uning davolanishi bilan bog‘liq xarajatlarni o‘z zimmasiga olgan.

2026 yilgi Jahon chempionati vaqtida Messi turnirdagi ilk golini urganidan so‘ng ko‘z yoshlarini tiya olmagan edi. Keyinchalik u oilasi og‘ir davrni boshdan kechirayotganini tan olgan.

Oradan bir necha kun o‘tib, Messining oilasi Xorxe davolanayotgani va uning ahvoli asta-sekin yaxshilanayotganini ma’lum qilgan edi.