Messi va Xavi o‘rtasidagi muzokaralarning ayrim jihatlari ochiqlandi

“Barselona” bosh murabbiyi Xavi va PSJ hujumchisi Lionel Messi o‘rtasidagi muzokaralarning ayrim tafsilotlari oshkor bo‘ldi. Argentinalik futbolchi Kataloniya klubiga qaytishi bo‘yicha Laporta bilan emas, balki faqatgina Xavining o‘zi bilan muzokara o‘tkazmoqda. Bu haqda BBC jurnalisti Gilem Balage o‘z Twitter sahifasida ma’lum qildi.

“Messi va Laporta bu masalada gaplashmagan, ammo “Barselona” mazkur transferni amalga oshirishga tayyorligi aniq. Muzokaralarning asosiy qahramoni Messi bilan muntazam gaplashib turadigan Xavi. Xavi argentinalik futbolchini yarim himoya pozitsiyasida o‘ynatmoqchi, bu Lionelning Argentina terma jamoasidagi pozitsiyasi bilan o‘xshash. Xavi Messidan foydalanishning turli yo‘llarini o‘ylab topadi”, deyiladi BBC jurnalisti xabarida.

Messining Fransiya klubi bilan shartnomasi joriy mavsum oxirida yakunlanadi. “Transfermarkt” portali hujumchining qiymatini 45 million yevroga baholamoqda. 

Eslatib o‘tamiz, Messi PSJ bilan yangi shartnomadan bosh tortgani va “Barselona”ga o‘tishga qiziqayotgani haqida xabar berilgandi. Messining otasi va PSJ prezidenti Nosir Al-Xelayfi shartnomani uzaytirish bo‘yicha kelisha olmadi.