Meksikada JCH ochilishi qanday o‘tdi? (fotoreportaj)

2026 yilgi FIFA Jahon chempionatining ochilish kuni munosabati bilan poytaxtda o‘tkazilgan tadbirlarda qariyb 500 ming kishi ishtirok etdi. Bu haqda Mexiko shahri Jamoat xavfsizligi vazirligi xabar berdi.

“Mexiko shahrida 2026 yilgi Jahon chempionatining ochilishini nishonlash maqsadida tashkil etilgan turli tadbirlarga yarim millionga yaqin odam tashrif buyurdi”, deyiladi shahar politsiyasi tarqatgan rasmiy byulletenda.

Rasmiylarning ma’lumotiga ko‘ra, Mexiko shahridagi stadionda o‘tkazilgan ochilish o‘yinini 80 ming nafar tomoshabin kuzatgan. Turnirning asosiy muxlislar maydoni hisoblangan poytaxt markazidagi Sokalo maydonida yana 100 ming kishi to‘plangan.

Shuningdek, shaharning barcha 16 tumanida tashkil etilgan futbol festivallarida taxminan 200 ming nafar muxlis ishtirok etgan. Yana 120 ming kishi Meksika poytaxtida sportdagi g‘alabalar nishonlanadigan an’anaviy maskanlardan biri – Mustaqillik farishtasi monumenti atrofida jamlangan.

Rasmiylar xavfsizlikni ta’minlash va tomoshabinlar harakatini muvofiqlashtirish maqsadida politsiya, fuqarolik mudofaasi xizmatlari hamda boshqa shahar idoralarini birlashtirgan idoralararo ishchi guruh tuzilganini ta’kidladi.

Xabarlarga ko‘ra, Meksika prezidenti Klaudiya Sheynbaum va Mexiko shahri meri Klara Brugada shahar shimolidagi Los Galeana sport majmuasida aholi bilan birgalikda o‘yinni tomosha qilgan.

Politsiya tadbirlar bayramona muhitda va jiddiy hodisalarsiz o‘tganini ma’lum qildi. Politsiya, sayyohlik politsiyasi hamda yo‘l harakati xavfsizligi xodimlari kun davomida mahalliy va xorijiy muxlislarga yordam ko‘rsatgan.

2026 yilgi FIFA Jahon chempionati Meksika, AQSH va Kanada mezbonligida o‘tkazilmoqda. Mexiko shahri turnirning bir nechta uchrashuvlariga, jumladan, ochilish o‘yiniga mezbonlik qilmoqda.