Mask ikkinchi odamga miya chipi o‘rnatilganini e’lon qildi

Amerikalik tadbirkor, SpaceX hamda Tesla asoschisi Ilon Maskning Neuralink kompaniyasi ko‘ngillilardan yana bir odamga miya chipi o‘rnatilganini ma’lum qildi. Bu haqda amerikalik milliarder X ijtimoiy tarmog‘ida ma’lum qildi.

Shifokorlar ko‘ngilli bemorning miyasiga falaj bo‘lgan odamlarga raqamli qurilmalardan o‘z aqli bilan foydalanish imkonini beradigan kompyuter aloqa moslamasini muvaffaqiyatli joylashtirgan. Implantatsiya qilingan neyrochipda 400 ta elektrod ishlamoqda. Neuralink  saytidagi ma’lumotlarga ko‘ra, chip 1024 elektroddan foydalanadi.

Qurilma eshitish vositasi kabi quloq orqasiga biriktirilgan qabul qiluvchi kapsuladir. Ipga o‘xshash elektrodlar kapsuladan miyaga o‘tadi. Umuman olganda, miyaga 1500 tagacha elektrod joylashtiriladi, ularning har biri inson sochidan to‘rt barobar yupqaroqdir. Bitta 4x4 mm protsessor 10 ming elektroddan olingan ma’lumotlarni qayta ishlaydi.

Birinchi chip yanvar oyida implantatsiya qilingan

2024 yil yanvar oyi oxirida yelkasining past qismi shol bo‘lib qolgan odamga ilk marta miya chipi o‘rnatilgandi. U video o‘yinlar va shaxmat o‘ynashi, o‘z fikrlari bilan harakatlar qilishi, internetdan foydalanishi va ijtimoiy tarmoqlarda postlar chop etishi mumkin edi.

Operatsiyadan bir oy o‘tgach, ishlab chiquvchilar qurilmadagi nosozliklarni payqashdi. “The Wall Street Journal” ma’lumotlariga ko‘ra, chipning ipga o‘xshash elektrodlarining aksariyati siljigan va signallarni o‘qishni to‘xtatgan. Shundan so‘ng, Neuralink muammo takrorlanmasligi uchun chipni ikkinchi ko‘ngillining miyasining motor korteksiga chuqurroq joylashtirish niyatida ekanligini ma’lum qildi. May oyida kompaniya AQSH oziq-ovqat va farmatsevtika idorasidan chipni ikkinchi ko‘ngilliga implantatsiya qilish uchun ruxsat oldi.

Shuningdek, WSJ 2024 yil oxirigacha Neuralink qurilmalarni 10 nafar ko‘ngilliga implantatsiya qilishni rejalashtirganini yozmoqda.

Eslatib o‘tamiz, avvalroq Ilon Maskning miya chipi o‘rnatilgan falaj bemor kompyuter sichqonchasini boshqargani xabar qilingandi.