Mask aqldan ozgan – Tramp

AQSH Prezidenti Donald Tramp kecha, 6 iyul kuni o‘zining sobiq ittifoqchisi, milliarder Ilon Maskning o‘z partiyasini yaratish g‘oyasiga izoh berdi. Bu haqda Oq uy rahbari Nyu-Jersidagi golf klubidan Vashingtonga ketayotganida jurnalistlarga ma’lum qildi.

“Uchinchi partiyalar hech qachon ish bermagan, shuning uchun u bu bilan ko‘ngil ochishi mumkin, lekin menimcha, bu bema’nilik”, dedi Tramp.

Keyinroq u o‘zining Truth Social ijtimoiy tarmog‘ida Mask “butunlay aqlini yo‘qotganini” yozdi.

Prezidentning ta’kidlashicha, Qo‘shma Shtatlarda uchinchi yirik partiya yaratishga urinishlar hech qachon muvaffaqiyat qozonmagan, chunki Qo‘shma Shtatlardagi ikki partiyaviy siyosiy tizim “ular uchun ishlamayapti”.

“Uchinchi partiyalar uchun foydali bo‘lgan yagona narsa – bu to‘liq va butkul inqiroz va tartibsizlikni yaratish va biz o‘z ishonchini va aqlini yo‘qotgan radikal so‘l demokratlar bilan kifoyalandik!” deb yozdi Tramp.

Ayni paytda, uning so‘zlariga ko‘ra, Respublikachilar partiyasi “yaxshi yog‘langan mashina bo‘lib, u AQSH tarixidagi eng yirik qonun loyihasini qabul qilgan”. Tramp Kongress orqali ilgari surgan va 4 iyul, Mustaqillik kunida imzolagan “katta, chiroyli qonun loyihasi”ni nazarda tutmoqda. Qonun loyihasi, jumladan, soliqlarni kamaytirishni uzaytiradi, mudofaa va chegara xavfsizligiga xarajatlarni oshiradi va ijtimoiy xarajatlarni qisqartiradi.

Oq uy rahbarining ta’kidlashicha, “katta, chiroyli qonun loyihasi”, shuningdek, “afsuski, Ilon uchun” “elektr avtomobil mandati” deb ataladigan narsani – amerikaliklarni transportning ushbu turiga o‘tishga undash uchun avvalgi prezident Jo Bayden davrida qabul qilingan chora-tadbirlar majmuasini bekor qiladi.

Respublikachining aytishicha, milliarder Trampning “elektromobil mandati”ni bekor qilish niyatini boshidan bilgan va go‘yo u “bu bilan hech qanday muammosi yo‘qligini” aytgan. Ma’lumki, Mask elektromobil ishlab chiqaruvchi Tesla kompaniyasi asoschilaridan biridir.

Trampning ikkinchi prezidentlik muddati boshida Mask o‘zi tashabbus qilgan Hukumat samaradorligi departamentini (DOGE) boshqargan, biroq may oyi oxirida vakolat muddati tugashi munosabati bilan davlat ishidan ketishini e’lon qilgan. Iyun oyi boshida Tesla va SpaceX kosmik kompaniyasi rahbari “katta go‘zal qonun” loyihasini tanqid qilib, uni “jirkanch ish” deb atadi, bu esa “ulkan davlat byudjeti taqchilligini oshirish”ini aytdi.

Mask, shuningdek, keyingi saylovlarda demokrat nomzodlarni qo‘llab-quvvatlash bilan tahdid qildi, buning uchun Tramp o‘zining sobiq ittifoqchisiga “juda jiddiy muammolar”ni va’da qildi.

Keyinchalik u yarashuvchi bayonot berdi. Biroq 1 iyul kuni AQSH prezidenti Tesla va Maskning boshqa kompaniyalariga ajratilgan davlat subsidiyalari bo‘yicha audit o‘tkazish bilan tahdid qilganidan keyin mojaro yana avj oldi.

“Ushbu yordamsiz u do‘konni yopishi va Janubiy Afrikaga qaytishi kerak bo‘lardi. Endi raketa uchirish, sun’iy yo‘ldoshlar yoki elektromobil ishlab chiqarish bo‘lmasa, mamlakatimiz boylik tejagan bo‘lardi”, deb yozgan Tramp Truth Social'da.

Mask 4 iyul – Mustaqillik kunida “Amerika” partiyasini boshlashimiz kerakmi?” deb nomlangan so‘rovnoma o‘tkazdi va u 24 soat ichida 1,3 millionga yaqin ovoz to‘pladi. So‘ralganlarning 65 foizdan ortig‘i “ikki partiyaviy tizimdan mustaqil bo‘lish” g‘oyasini qo‘llab-quvvatlagan.

“Bu 2 ga 1 nisbat: siz yangi siyosiy partiyani xohlaysiz va siz uni olasiz! Mamlakatimizni isrofgarchilik va korrupsiya orqali bankrot qilish haqida gap ketganda, biz demokratik emas, bir partiyaviy tizimda yashaymiz” deya qo‘shimcha qildi Mask.

Kecha, 6 iyul kuni Amerika partiyasini ro‘yxatga olish hujjatlari AQSH Federal saylov komissiyasiga kelib tushgani ma’lum bo‘ldi. Biroq Ilon Mask ularni topshirganmi yoki yo‘qmi, noma’lum – milliarderning o‘zi buni hali tasdiqlagani yo‘q.