Marg‘ilonda Safed to‘da masjidi devorining bir qismi qulab tushdi

Farg‘ona viloyatining Marg‘ilon shahrida bir necha kun davom etgan yog‘ingarchilik sabab “Guravel” MFY hududida joylashgan Safed to‘da masjidi devorining bir qismi qulab tushdi. Bu haqda Farg‘ona viloyati Madaniy meros boshqarmasi ma’lum qildi.

Mazkur muammo yuzasidan Farg‘ona viloyat madaniy meros boshqarmasi xodimlari tomonidan ishchi guruh tuzilgan.

Qayd etilishicha, mas’ullar masjid binosini o‘rganish va uning qolgan qismini asrab qolish uchun chora-tadbirlar ko‘rishmoqda.

Safed to‘da masjidi XIX asrda qurilgan. U Vazirlar Mahkamasining 2019 yil 4 oktyabrdagi 846-sonli qarori bilan tasdiqlangan "Moddiy-madaniy merosning ko‘chmas mulk ob’ektlari milliy ro‘yxati"ga, 2022 yil madaniy meros ob’ektlarini ta’mirlash uchun ajratiladigan respublika byudjeti mablag‘lari hisobidan restavratsiya qilinishi lozim bo‘lgan ob’ektlar ro‘yxatiga kiritilgan.

Avvalroq Buxoro shahrida noqulay ob-havo sabab qal’a devorining bir qismi qulab tushgani haqida xabar bergan edik.