“Manchester Yunayted” va “Arsenal” “Leypsig” futbolchisi uchun kurashadi

Yoz yaqinlashgani sari futbolchilarning transferi borasidagi mish-mishlar avj olishni boshlamoqda. Bir qator jamoalar tarkiblarini kuchaytirib olish uchun yangi futbolchilarni sotib olishni xohlamoqda. 

“Manchester Yunayted” bosh murabbiyi Ralf Rangnikka ko‘ra, “qizil iblislar”  “Leypsig” yarim himoyachisi Kristofer Nkunkuni sotib olishi kerak. Rangnikning ta’kidlashicha, Nkunku Yevropaning eng iste’dodli yarim himoyachilaridan biri hisoblanadi. “Buqalar”dan Kristoferni sotib olish foydali bo‘lishi mumkin. Biroq uni qo‘lga kiritish oson bo‘lmaydi. Sababi, Nkunkuga havasmandlarni soni juda ham ko‘p.

“Arsenal” yozda  Nikolya Pepedan qutulishning yo‘lini topsa, “to‘pchilar” ham “Leypsig” yarim himoyachisi Kristoferni sotib olishni xohlaydi, deb xabar beradi, “Football London”.

Ma’lumot uchun, Nkunku “Leypsig” safida Germaniya Bundesligasida 22 ta uchrashuvda maydonga tushib, 11 ta gol va 9 golli uzatma amalga oshirgan. “Transfermarkt” Kristoferga 55 million yevro narx belgilagan, lekin xaridorlar ko‘pligi bois bu narx yanada ko‘tarilishi kutilmoqda.

Ma’ruf Abdumalikov