Klinton Zarafshon bilan birodar bo‘lmoqchi

Navoiy viloyatining Zarafshon shahri va AQSHning Klinton shahri o‘rtasida birodarlashgan shaharlar to‘g‘risida kelishuv imzolanishi rejalashtirilmoqda.

Bu haqda O‘zbekiston Respublikasining AQSHdagi Favqulodda va muxtor elchisi Javlon Vahobov Navoiy viloyati hokimi bilan o‘tkazilgan videokonferensaloqada ma’lum qildi.

Mazkur muloqot joriy yil 8 aprel kuni Prezident Shavkat Mirziyoyev boshchiligida bo‘lib o‘tgan yig‘ilishda berilgan hududlarda xorijiy investitsiyalarning o‘z vaqtida samarali o‘zlashtirilishini ta’minlash borasida yangi nazorat tizimi joriy etish, har haftaning chorshanba kunini “Investorlar kuni” sifatida belgilash topshirig‘i ijrosi doirasida o‘tkazildi.

Javlon Vahobovning aytishicha, 15-16 may kunlari AQSH ishbilarmon doira vakillari bilan o‘tkaziladigan forumda 100 dan ortiq tadbirkorlar qatnashish istagida ekanligini bildirgan.

Shuningdek, o‘tkazilgan muloqotlarda O‘zbekiston rahbarining joriy yil 12-13 mart kunlari Navoiy viloyatiga tashrifi doirasida ma’qullangan xorijlik ishbilarmonlar bilan hamkorlikdagi investitsion loyihalarning ijrosi ta’minlanishi, yuzaga kelayotgan jihatlar va ularning yechimi muhokama ham qilindi.

Xususan, “US Inc.” kompaniyasining Navoiy shahrida tibbiy tez yordam markazi, diagnostik markaz hamda klinika barpo etish loyihasi bo‘yicha korxona ta’sischilari tomonidan joriy yil 15-16 may kunlari korxonaga ajratilgan yer maydonida qurilish ishlarini boshlab, tamal toshi qo‘yish marosimi amalga oshirilishini, “Calatrava grace corporation” tomonidan arzon uy-joylar qurilishi uchun monobloklar ishlab chiqarish zavodi qurilishi loyihasi bo‘yicha ham 15-16 may kunlari Navoiy viloyatiga tashrifi chog‘ida investitsion kelishuv imzolanishi kutilayotganligi va mazkur forumga 100 nafardan ziyod amerikalik ishbilarmonlar kelmoqchi ekanligi inobatga olinib, O‘zbekiston tomonidan ular bilan hamkorlik qiladigan korxonalar ro‘yxatini shakllantirish hamda B2B-uchrashuvlarni tashkil etishga kelishib olindi.