Kim Chen In qizi bilan navbatdagi tadbirda ko‘rinish berdi

Shimoliy Koreya yetakchisi Kim Chen In va uning qizi “Yorqin yulduz” kuni (KXDR marhum yetakchisi Kim Chen Irning tug‘ilgan kuni) munosabati bilan Vazirlar Mahkamasi va Mudofaa vazirligi jamoalari o‘rtasida o‘tkazilgan sport musobaqasida ishtirok etdi. Bu haqda bugun, 18 fevral kuni Koreya markaziy axborot agentligi xabar berdi.

Qayd etilishicha, sport bayrami doirasida futbol va arqon tortish musobaqasi bo‘lib o‘tgan. Ikkala o‘yinda ham Mudofaa vazirligi jamoasi g‘alaba qozongan: futbol bo‘yicha 3:1, arqon tortishda 2:0. Tomoshabinlar orasida Bosh vazir Kim Dok Xun, mudofaa vaziri Kan Sun Nam, Koreya Mehnat partiyasi Markaziy qo‘mitasi Siyosiy byurosi Prezidiumi a’zosi Cho Yon Von, Markaziy qo‘mita kotiblari, hukumat a’zolari, vazirlik vakillari, mansabdor shaxslar va zobitlar ham bo‘lgan. Davlat matbuotida tarqalgan suratlar Kim Chen Inning singlisi Kim Yo Chon ham tadbirda qatnashganini tasdiqlagan.

Janubiy Koreya matbuotiga ko‘ra, sport musobaqasi Kim Chen Inning qizi Kim Chju E ishtirok etgan oltinchi ommaviy tadbir bo‘lgan. Bunga qadar Shimoliy Koreya rahbari qizini asosan harbiy tadbirlarga olib borgan edi. Biroq bu safar ota-qiz birinchi marta qurolli kuchlarga aloqador bo‘lmagan jarayonda namoyon bo‘ldi. 

Eslatib o‘tamiz, oldinroq Chju E raketa sinovi va harbiy paradda ishtirok etgan edi.