Xorazmdagi bozorlardan birida yong‘in chiqdi (video)

Xorazmning Xiva shahridagi bozorlardan birida bugun, 24 iyul kuni yong‘in yuzaga keldi. Bu haqda Favqulodda vaziyatlar vazirligi matbuot xizmati xabar berdi. 

Ma’lum qilinishicha, bugun, 24 iyul kuni soat 17:42 da Xorazm viloyati Xiva shahri “Sangar” MFY Elobod ko‘chasida  joylashgan “Xiva Buyum bozori” hududidagi kiyim-kechak hamda oziq-ovqat do‘konlarida yong‘in sodir bo‘layotganligi to‘g‘risida viloyat Favqulodda vaziyatlar boshqarmasiga xabar kelib tushgan.

Shunga ko‘ra 12 ta yong‘in-qutqaruv ekipaji hodisa joyiga 17:50 da yetib borgan va 19:25 da o‘rab olinib, soat 20:10 ga kelib bartaraf etilgan. Yong‘indan 1000 kvadrat/metr maydonda konteyner va yengil tipdagi savdo rastalar zararlangan.

Hodisa oqibatida tan jarohati olgan yoki halok bo‘lganlar yo‘q. Voqea joyiga viloyat hamda tuman FVB rahbar xodimlari yetib borgan.

Eslatib o‘tamiz, avvalroq Farg‘ona viloyatining Qo‘qon shahridagi eng katta bozor yonib ketgandi.