Xitoy internetdagi salbiy his-tuyg‘ularga qarshi “urush” e’lon qildi

Xitoy hukumati internetda salbiy hissiyotlarni targ‘ib qiluvchi foydalanuvchilarga qarshi ikki oylik kampaniya boshlaganini e’lon qildi. Bu haqda joriy yilning 23 sentyabr kuni mamlakatning Kibermakon boshqarmasi bayonotiga tayanib, “The Register” nashri xabar berdi.

Kampaniya doirasida hukumat ijtimoiy tarmoqlar, qisqa platformalar va internet-do‘konlarning reklama uchun foydalanadigan striming xizmatlariga alohida e’tibor qaratadi. Shuningdek, internet bo‘ylab qoldiriladigan izohlar ham tekshiruvdan o‘tkaziladi.

Pekin yo‘qotmoqchi bo‘lgan kontentlar qatorida zo‘ravonlikka undovchi materiallar ham bor. Ammo Xitoy asosan “mehnatning foydasi yo‘q” yoki “o‘qish befoyda” kabi haddan tashqari salbiy kayfiyatni targ‘ib qiluvchi kontentlarni to‘xtatmoqchi. Bunday qarashlar mamlakat yoshlari orasida keng tarqalgan “Sang madaniyati”ga xos bo‘lib, u yashashning yuqori xarajatlari va iqtisodiy qiyinchiliklar tufayli umidsizlik va norozilikni bildiradi.

Ko‘plab oliy ma’lumotli yoshlar qiziqarli ish topishda qiynalayotgani ham bu kayfiyatni kuchaytirmoqda. Ijtimoiy tarmoqlarning foydalanuvchilarga moslashtirilgan kontenti esa salbiy mavzularga yanada chuqurroq sho‘ng‘ishga olib kelmoqda. Shu sabab hukumat “hayotga nisbatan haddan tashqari pessimist qarashlarni yoyadigan” yoki “o‘zini ortiqcha kamsitadigan” kontentlarni nishonga olishni rejalashtirgan.

Shuningdek, zo‘ravonlikni tasvirlovchi sun’iy intellekt yordamida yaratilgan kontent ham taqiqlanadi. “The Register”ning yozishicha, Pekin internet-trollarini “ko‘prik tagiga yashirishni” rejalashtirmoqda.

Fitna nazariyalari va soxta yangiliklar tarqatilishiga ham chek qo‘yiladi. Bunday kontentni yaratuvchi yoki joylashtiruvchi platforma va shaxslar jazoga tortiladi. Bu esa G‘arb ijtimoiy tarmoqlaridagi oddiy “uzr”dan ko‘ra jiddiyroq chora hisoblanadi. Manba kampaniyaning qachon boshlanishi va qachon tugashiga oid aniq muddatni keltirmagan.