Kennedilar oilasi Oq uyga qaytadimi?

AQSHning 35-prezidenti Jon Kennedining jiyani, huquqshunos va siyosatchi kichik Robert Kennedi 2024 yilgi prezidentlik saylovlarida ishtirok etish haqida o‘ylamoqda. Bu haqda u kecha, 3 mart kuni “Fox News” telekanali bergan intervyusida ma’lum qildi.

Telekanal xabar berishicha, Nyu-Xempshirda bo‘lib o‘tgan tadbirda so‘zga chiqqan 69 yoshli Kennedi prezidentlik saylovlarida qatnashish haqida o‘ylayotganini aytgan. 

“Ha, men bu haqda o‘ylayapman. Asosiy to‘siq – rafiqamdan yashil chiroq bilan o‘tdim”, degan Robert Kennedi hazillashib.

Ma’lumot uchun, bo‘lajak nomzod senator Robert Kennedining (1925-1968) o‘g‘li va AQSHning eng taniqli rahbari Jon Kennedining (1917-1963) jiyani hisoblanadi. Manbaga ko‘ra, siyosatchi AQSH Demokratik partiyasidan nomzod ko‘rsatish uchun ariza bermoqchi.

Eslatib o‘tamiz, 2022 yilning noyabrida Respublikachilar partiyasidan sobiq prezident Donald Tramp 2024 yilgi prezidentlik saylovida o‘z nomzodini qo‘yishini ma’lum qilgan edi. Amaldagi Prezident Jo Bayden ham 9 noyabr kuni davlat rahbari lavozimiga qayta saylanish uchun kurash olib borish rejasini e’lon qilgan, biroq yakuniy qarorni faqat shu yil boshida qabul qilishini ta’kidlagandi.