Karimovning yaxtasiga yangi ega topildi

Rossiyalik milliarder oligarx Sulaymon Karimovga tegishli bo‘lgan Amadea superyaxtasi yangi egasini topdi. Bu haqda “Business Insider” xabar berdi.

Nashrning yozishicha, AQSH Adliya vazirligi 106 metrlik kemani 10 sentyabr kuni yakunlangan kimoshdi savdosiga qo‘yib, uni noma’lum xaridorga sotgan. Auksion Floridada joylashgan National Maritime Services kompaniyasi tomonidan o‘tkazildi. Tranzaksiya summasi oshkor etilmadi. Amadea’ning qiymati 300 million dollarga baholangan, ammo yaqinda mustaqil baholash uni 230 million dollarga tushirgan. AQSH rasmiylari Amadea’ni iloji boricha tezroq sotishga intildi, chunki yaxtani saqlash soliq to‘lovchilarga ekipaj, yoqilg‘i va sug‘urta uchun oyiga qariyb 1 million dollarga tushadi.

Germaniyaning Lürssen kemasozlik zavodi tomonidan qurilgan olti qavatli Amadea (lotin tilidan “Xudoning sevgisi”) suzuvchi saroy hisoblanadi. Bezatishda marmar va nodir yog‘ochdan foydalanilgan, ayrim detallari toshlar bilan bezatilgan. U 8 ta kabinaga ega. Hammasi bo‘lib u 16 mehmon va 36 ekipaj a’zosini sig‘dira oladi. Yaxtada vertolyot maydonchasi, suzish havzasi, sport zali, kurort, konferensiya zali, vino yerto‘lasi va omar akvariumi mavjud. Intererning markaziy elementi qo‘lda bo‘yalgan Pleyel royal bo‘lib, uning barcha qismlari, pedallardan tortib ilgaklarigacha 24 karatlik oltindan yasalgan.

Musodara qilingan yaxtaga egalik qilish xavf tug‘diradi, chunki egalik huquqi bahsli bo‘lishi mumkin.

Yaxta 2022 yilning bahorida AQSH talabiga binoan Fijida hibsga olingan va San-Diyegoga olib ketilgan. Karimovning o‘zi yaxtaga egalik qilishini rad etgan. Biroq AQSH Adliya vazirligi sudga ekipaj ko‘rsatmalari va milliarder Amadea yaxtasining birinchi yo‘lovchisi bo‘lganini ko‘rsatadigan yozuvlarni taqdim etdi. E’lon qilingan ma’lumotlarga ko‘ra, yaxtaning intereri Karimovlar oilasining shaxsiy iltimosiga ko‘ra ta’mirlangan, pitssa pechi va kurortlar o‘rnatilgan. Ekipaj a’zolaridan biriga yaxtada milliarderning sevimli Nike krossovkalaridan bir juftini doimo olib yurish buyurilgan.

Dog‘istonlik Federatsiya Kengashi a’zosi Sulaymon Karimov 2018 yilda “Prezident Vladimir Putin rejimidan manfaatdor bo‘lgan va Rossiyaning g‘arazli faoliyatini ilgari surishda muhim rol o‘ynaydigan” senator sifatida AQSH tomonidan sanksiyalangan edi. Shunga qaramay, AQSH Adliya vazirligiga ko‘ra, 2021 yilda milliarder Amadea’ni ishonchli shaxslar orqali sotib olishga rozi bo‘lgan.

Rasmiy ravishda yaxta sotishdan 30 kun oldin ro‘yxatga olingan Millemarin Investments Ltd. mulkiga aylandi. Kelishuvda Errigan Marine kompaniyasi ham ishtirok etdi, uning nominal egasi ruxsat etilgan yaxta brokeri Imperial Yachts bosh direktori Yevgeniy Kochman.

AQSH Adliya vazirligi bergan ma’lumotga ko‘ra, 2021 yilning oktyabr oyidan yaxta Fiji hukumati tomonidan tortib olingunga qadar Karimov va uning oila a’zolari Amadea bortida bir necha bor sayohat qilgan, yaxtani keng ko‘lamli modernizatsiya qilishni rejalashtirgan, uzoq muddatli sayohatlar jadvalini tuzgan, shuningdek, barcha texnik xarajatlarni o‘z zimmasiga olgan, unga 2 million dollar sarflagan.

Musodaradan so‘ng, “Rosneft”ning sobiq bosh direktori Eduard Xudaynatov yaxtaga egalik huquqini da’vo qilishga uringan. Biroq, AQSH rasmiylari uni Karimovning egaligini yashirishga uringan front odami, deb bilgan. 2025 yilning iyul oyida Nyu-Yorkdagi federal sudya Amadea’ni kimoshdi savdosiga qo‘yishga ruxsat berdi.

Eslatib o‘tamiz, avvalroq rossiyalik milliarder oligarx Sulaymon Karimovga tegishli bo‘lgan Amadea superyaxtasi Kaliforniyaning San-Diyego shahridagi yopiq kimoshdi savdosiga qo‘yilgandi.