Qutqaruvchilar Indoneziyada qulagan samolyot qoldiqlarini topdi

Indoneziyalik qutqaruvchilar Yava dengiziga qulagan “Sriwijaya Air” samolyoti qoldiqlarini topdilar. Bu haqda bugun, 10 yanvar kuni jurnalistlarga Respublika dengiz floti vakili Faxrul ma’lum qildi.

“Biz havo tashuvchisi rangidagi fyuzelyaj qoldiqlari, elektr simlar va shassini topishga muvaffaq bo‘ldik”, deydi u.

Faxrul layner qismlari Seribu arxipelagi tarkibiga kiruvchi Laki va Lankang orollari o‘rtasida topilganiga aniqlik kiritdi. Unga kra, tez orada bularning barchasi qirg‘oqqa yetkaziladi.

Avvalroq, Indoneziya poytaxti Jakartadan G‘arbiy Kalimantan hududidagi Pontianak shahriga yo‘l olgan “Sriwijaya Air” aviakompaniyasi samolyoti havoga ko‘tarilganidan ko‘p o‘tmay radarlardan g‘oyib bo‘lgani haqida xabar bergandik. 

Mahalliy televideniye ma’lumotlariga ko‘ra, samolyot Jakarta yaqinida suvga qulagan. 

Qayd etilishicha, layner qoldiqlari va yo‘lovchilarning jasadlari suvdan topilgan. 

Indoneziya Qidiruv-qutqaruv agentligi vakili Yusuf Latif Jakartadan parvoz qilgan samolyot bilan aloqa uzilganini tasdiqlagan. 

Ma’lumotlarga ko‘ra, samolyot Indoneziya poytaxtidan jo‘nab ketganidan 4 daqiqa o‘tgach, ko‘zdan g‘oyib bo‘lgan. Samolyot bortida 59 nafar yo‘lovchi, shu jumladan olti nafar bola bo‘lgan. Voqeaga guvoh bo‘lgan baliqchilar havoda ikki marta portlash sodir bo‘lganini ko‘rgan. Qutqaruv operatsiyasi davomida suvda samolyot va odam tanasining bo‘laklari topilgan.