Qo‘qonda novvoyxona yarim mlrd so‘mlik gazni talon-toroj qildi

Farg‘ona viloyatining Qo‘qon shahrida novvoyxona tabiiy gaz tarmog‘iga noqonuniy ulangan holda gazdan foydalanib kelgani aniqlandi. Holat bo‘yicha 496 million so‘mlik tabiiy gaz qayta hisob-kitob qilindi. Bu haqda “Hududgazta’minot” AJ xabar berdi.

Qayd etilishicha, “Hududgaz Farg‘ona” Gaz ta’minoti filiali komplayens nazorat tuzilmalari, shahar gaz ta’minoti bo‘limi xodimlari hamda huquq-tartibot organlari hamkorligida Qo‘qon shahrida nazorat tadbiri o‘tkazilgan.

Tekshiruv davomida shaharning “Ziyolilar” MFYda joylashgan novvoyxona loyiha-texnik hujjatlarisiz tabiiy gaz tarmog‘iga o‘zboshimchalik bilan ulangan holda gazdan noqonuniy foydalanib kelayotgani aniqlangan.

Holat yuzasidan dalolatnoma tuzilib, 496 million so‘mlik tabiiy gaz hajmi qayta hisob-kitob qilingan. To‘plangan barcha hujjatlar huquqni muhofaza qiluvchi organlarga yuborilgan.

Eslatib o‘tamiz, avvalroq Farg‘ona viloyatida o‘tkazilgan nazorat tadbirlari davomida tabiiy gazdan noqonuniy foydalanish bilan bog‘liq ikki holat aniqlangan edi.