Qozog‘istonda dahshatli avariya sodir bo‘ldi (video)

Qozog‘istonning Chimkent shahrida haydovchi qarovsiz qoldirgan avtobus 6 kishini bosib ketdi, oqibatda 5 kishi halok bo‘ldi. Bu haqda “Bizmedia.kz” xabar berdi.

Fojia Chimkent shahrida ro‘y bergan. “Baxit” turar-joy majmuasi yonida haydovchi e’tiborsiz qoldirgan yo‘lovchi avtobusi 6 nafar piyodani urib yuborgan. Voqea guvohlarining so‘zlariga ko‘ra, avtomashina o‘z-o‘zidan qiyalikdan pastga harakatlanib, “Bayterekov” ko‘chasida odamlarning ustiga kelib qolgan. Bir necha kishi turli darajadagi tan jarohatlari olib, kasalxonaga yotqizilgan. Chimkent sog‘liqni saqlash boshqarmasi ma’lumotlariga ko‘ra, uch kishi voqea joyida halok bo‘lgan, yana 2 kishi keyinroq vafot etgan.

Politsiya ma’lumotlariga ko‘ra, haydovchi oxirgi yo‘nalish bo‘ylab burilishdan so‘ng avtobusni qo‘l tormozida qoldirgan. Avtobus o‘z-o‘zidan qiyalikdan pastga siljigan va piyodalar bilan to‘qnashib ketgan. Ayni paytda avtobus tekshiruv va sinovdan o‘tkazilmoqda.

Haydovchi qo‘lga olinib, Qozog‘iston Respublikasi Jinoyat kodeksining 345-moddasi 4-qismi bilan tergovga qadar tekshiruvga jo‘natilgan. Voqea joyida tergovchilar va kriminologlar ishlamoqda. Avtobusning yaroqliligini tekshirish uchun avtotexnik ekspertiza tayinlangan.