Qozog‘istonda 2 o‘zbekistonlik halok bo‘ldi

Qozog‘istonning Oqto‘be viloyatida sodir bo‘lgan yo‘l-transport hodisasida ikki nafar o‘zbekistonlik halok bo‘ldi. Bu haqda mamlakat Ichki ishlar vazirligi Matbuot xizmati xabar berdi.

Keltirilishicha, voqea kecha, 16 may kuni Samara-Chimkent avtomobil yo‘lining 824-kilometrida sodir bo‘lgan. Toyota RAV-4 va Lacetti avtomobillari to‘qnashib ketgan.

Oqibatda Lacetti avtomashina haydovchisi va yo‘lovchisi O‘zbekiston Respublikasi fuqarolari voqea joyida halok bo‘lgan. Shuningdek, Lacetti avtomashinada bo‘lgan uch nafar yo‘lovchi va Toyota RAV-4 avtomobilidagi er-xotin va 5 yoshli bola tibbiy muassasaga yetkazilgan.

Hozirda mazkur holat yuzasidan tergov harakatlari boshlangan.

Eslatib o‘tamiz, joriy yilning 15 may kuni ertalab Rossiyaning Moskva va Sankt-Peterburg shaharlari oralig‘idagi M-11 trassaning 641-kilometrida O‘zbekiston fuqarolari ishtirokida yo‘l-transport hodisasi yuz bergan edi. Bir nechta avtomobil ishtirokidagi avtohalokatda to‘rt nafar O‘zbekiston fuqarosi jabrlanib, ulardan ikki nafarining ahvoli og‘ir ekani aytilgan edi.