Qozog‘iston bug‘doy va un eksportiga qo‘yilgan cheklovlarni bekor qildi

Olam 5176
image

Joriy yilning 10 sentyabridan boshlab Qozog‘iston hukumati chorva mollarini eksport qilish uchun kvotani belgilash bilan birga, mamlakatdan bug‘doy va un eksportiga qo‘yilgan mavjud cheklovlarni bekor qilishga ruxsat bermoqda. Bu haqda Hukumat Matbuot xizmati ma’lum qildi. 

Aprel oyida respublikada un va bug‘doy eksportiga 15 iyunga qadar cheklovlar joriy etilgan edi. Keyinroq ularning muddati 30 sentyabrgacha uzaytirildi. Ayni paytda don eksporti uchun kvota hajmi 550 ming tonnadan, un esa 370 ming tonnadan oshmaydi. 

"Hududlararo komissiya yig‘ilishida e’lon qilingan Qishloq xo‘jaligi vazirligi ma’lumotlariga ko‘ra, Qozog‘istonda g‘alladan mo‘l hosil olish kutilmoqda. 

Joriy yilda 13 million tonnadan ortiq bug‘doy yig‘ib olish rejalashtirilgan, bu o‘tgan yilgi hosildan 12 foizga ko‘p. Ichki iste’mol uchun qariyb 6,5 million tonna yetarli. Shu sababli bug‘doy va un eksportiga qo‘yilgan miqdoriy cheklovlarni 10 sentyabrdan olib tashlash to‘g‘risida qaror qabul qilindi”, deyiladi xabarda. 

Bundan tashqari, qoramol va mayda shoxli mollarni eksport qilish uchun kvotalarni belgilash tasdiqlangan.

"Statistik ma’lumotlarga ko‘ra, 2022 yil 1 avgust holatiga ko‘ra, qoramollar soni 9,4 million bosh, jumladan, sigirlar 4,5 million bosh, nasldor mollar 3,2 million boshni tashkil etgan. Buqalarni 60 ming bosh yoki umumiy chorva mollarining 9 foizi, shuningdek 120 ming bosh qo‘chqor yoki umumiy chorva mollarining 10 foizi miqdorida kvota belgilash to‘g‘risida qaror qabul qilindi”, deyiladi xabarda.

Diyora Abdurahmonova
Maqolaga baho bering
Baholaganlar: 181
Reyting: 3.1
t
×