Qozog‘iston BRICS’ga ariza topshirishdan o‘zini tiyadi 

Qozog‘iston Prezidenti Qosim-Jomart To‘qayev BRICS’ga qo‘shilish bo‘yicha takliflar oldi. Bu haqda Prezidentning maslahatchisi va matbuot kotibi Berik Uali “Tengrinews” axborot agentligiga bergan intervyusida ma’lum qildi.

“Qozog‘iston BRICS evolyutsiyasini qiziqish bilan kuzatmoqda va tashkilotning ta’sischi davlatlari rahbarlarining har qanday qudratli davlatlar gegemonligidan xoli, adolatli, demokratik dunyo tartibini barpo etish uchun barcha sa’y-harakatlarni amalga oshirish haqidagi chaqiriqlarini qo‘llab-quvvatlaydi”, dedi Uali.

Uning so‘zlariga ko‘ra, Qozog‘iston xalqaro hamjamiyatning mas’uliyatli va obro‘li a’zosi sifatida tan olinganligi sababli, Prezident Qozog‘istonning BRICS’ga qo‘shilishi bo‘yicha takliflar olgan.

“Ushbu takliflar davlat rahbari tomonidan diqqat bilan ko‘rib chiqilib, uning topshirig‘iga ko‘ra tegishli idoralar tomonidan Qozog‘iston milliy manfaatlari nuqtai nazaridan tahlil qilinmoqda”, deydi matbuot kotibi.

Uning aytishicha, hozirda va, ehtimol, yaqin kelajakda Qozog‘iston a’zolik masalasini ko‘rib chiqishning ko‘p bosqichli jarayoni, shuningdek, ushbu assotsiatsiyaning rivojlanish istiqbollari bilan bog‘liq boshqa fikrlarni hisobga olgan holda BRICS’ga ariza berishdan bosh tortadi.

Matbuot kotibi, shuningdek, Qozog‘iston Prezidentining dasturiga 23-24 oktyabr kunlari Qozonda bo‘lib o‘tadigan BRICS sammitida qatnashish ham kiritilganini aytdi.

“U 24 oktyabr kuni tashkilotning kengaytirilgan yig‘ilishida ma’ruza qilishni rejalashtirmoqda”, dedi u.

Qozog‘iston uchun ustuvor tashkilot haqida gapirar ekan, Uali “Prezident BMTni universal va bahssiz tashkilot sifatida bir necha bor ta’kidladi, unda barcha dolzarb xalqaro muammolar, jumladan, adolatli dunyo tartibi qurish bilan bog‘liq masalalar muhokama qilinishi mumkin va kerak."

“Prezidentning so‘zlariga ko‘ra, BMT kamchiliklardan xoli emas, lekin boshqa bunday tashkilot yo‘q, shuning uchun u jahon hamjamiyatining qo‘llab-quvvatlashiga muhtoj. BMT Nizomi esa xalqaro huquqning asosi bo‘lib xizmat qilishi kerak, bu asosiy hujjatda belgilangan tamoyillarni hech kim buzishga haqli emas. Prezident allaqachon BMT Xavfsizlik Kengashi muhim va taqdiriy qarorlar qabul qila olmaganidan afsusda ekanini bildirdi. Shuning uchun u BMT Xavfsizlik Kengashida “o‘rta kuchlar” manfaatlarini hisobga olgan holda BMTga a’zo davlatlarning keng ko‘lamli maslahatlashuvlari asosida islohotni boshlash zarur deb hisoblaydi”, deya qo‘shimcha qildi matbuot kotibi.