Qoraqalpog‘istondagi bog‘chada bolalarga yaroqsiz ovqat berilganmidi?  Rasmiy munosabat bildirildi

Avval xabar berganimizdek, ijtimoiy tarmoqlarda Qoraqalpog‘iston Respublikasidagi bog‘chalardan birida sifatsiz va yaroqsiz mahsulotlardan ovqat tayyorlanishi aytilgan videomurojaat tarqalgan edi. Bunga  Qoraqalpog‘iston Respublikasi Jo‘qorg‘i Kengesi tomonidan rasmiy munosabat bildirildi. 

Qayd etilishicha, Jo‘qorg‘i Kenges raisi Amanbay Orinbayev topshirig‘i bilan To‘rtko‘l tumani 8-sonli maktabgacha ta’lim tashkiloti (MTT)ni to‘satdan tekshirish boshlangan. Orinbayevning o‘rinbosari Rustam Tursinbayevich Saparbayev boshchiligidagi ishchi guruh ushbu bog‘chaga ogohlantirishsiz borgan. Shuningdek, To‘rtko‘l tumani hokimi, tuman prokurori, tuman SES boshlig‘i va maktabgacha ta’lim bo‘limi boshlig‘i ham bog‘chaga taklif qilingan.

Ishchi guruh tomonidan bolalar xonalari, uxlash sharoitlari, binolarni isitish, sanitariya inshootlari, oshxona va oziq-ovqat ombori tekshirilgan. 8- sonli MTT mudiri Aysha Mamatkarimova hamda bog‘cha xodimlari bilan suhbat o‘tkazilgan. 

O‘rganish natijasida quyidagilar aniqlangan:

“2022 yil 28 noyabrda o‘zlarini blogerlar deb tanishtirgan bir guruh shaxslar hech qanday qonuniy asosga ega bo‘lmagan holda va Vazirlar Mahkamasining 2019 yil 25 apreldagi 352-sonli qarorida nazarda tutilgan maktabgacha ta’lim muassasalarini jamoatchilik nazorati tartibiga rioya etmasdan, To‘rtko‘l tumanidagi 8-sonli maktabgacha ta’lim muassasasi hududiga bostirib kirishgan. Mantiqiy sanitariya-epidemiologiya me’yorlari va jamiyatdagi xulq-atvor me’yorlariga rioya etmagan holda, ular sodir bo‘layotgan voqealarning mohiyatini tushunish qiyin bo‘lgan bir nechta videolarni suratga olishgan va oshxonani tark etishni talab qilgan 8-sonli maktabgacha ta’lim muassasasi xodimlari bilan janjallashishgan”, deyiladi rasmiy ma’lumotda.

Ta’kidlanishicha, ushbu videolar keyin ijtimoiy tarmoqlarda tarqatilgan.

Vaziyatni o‘rganish jarayonida ilgari bog‘cha keytering xizmatlaridan foydalanganligi, ammo ota-onalardan sifatsiz oziq-ovqat ta’minoti bilan bog‘liq shikoyatlar kelib tushganligi, shuningdek, ovqatlar porsiyalari belgilangan me’yorlarga javob bermaganligi sababli, yetkazib beruvchining xizmatlaridan voz kechilganligi aniqlangan. 

“Bundan tashqari, bir necha bor 8-sonli maktabgacha ta’lim muassasasi mudiriga maktabgacha ta’lim muassasasi xizmatlaridan voz kechgan yetkazib beruvchiga aloqadormiz, deb o‘zlarini tanishtirgan noma’lum shaxslar tomonidan shantaj bilan bog‘liq tahdidlar kelib tushgan”, deb qo‘shimcha qilingan bayonotda.

Aytilishicha, bog‘cha rahbari 2022 yil sentyabr-noyabr oylari davomida 4-5 nafar tarbiyalanuvchilar orasida zaharlanish holatlari bo‘lganligini ma’lum qilgan.

SES mutaxassislarining fikriga ko‘ra, 4-5 nafar tarbiyalanuvchining zaharlanishi sanitariya-epidemiologiya me’yorlarining buzilishi va bog‘chaga sifatsiz oziq-ovqat yetkazib berish natijasida kelib chiqqan, deb ta’kidlash mumkin emas, chunki bu holda tarbiyalanuvchilarning ommaviy (tarbiyalanuvchilar umumiy sonining kamida 85 foizi) zaharlanishi sodir bo‘lar edi, lekin bunday holat ushbu tashkilotda qayd etilmagan. 

Mas’ul shaxslar bilan muloqot qilgandan so‘ng, Rustam Saparbayev 8-sonli maktabgacha ta’lim tashkiloti tarbiyalanuvchilarining ota-onalari bilan suhbatlashgan. Ular bog‘cha hududiga kirib kelgan shaxslarning harakatlaridan hayratdaligini va g‘azablanishlarini bildirganlar. Ota-onalar, shuningdek, muassasadagi sharoitlardan va maktabgacha ta’lim muassasasi xodimlarining professionalligidan mamnun ekanliklarini ta’kidlashgan. Shuningdek, noma’lum shaxslar MTT hududiga bostirib kirgan bunday holatlarning kelgusida oldini olishni so‘rashgan.

“Manfaatlar to‘qnashuvi, milliy qonunchilikning boshqa buzilishlari bilan bog‘liq holatlar bo‘lishi ehtimolini e’tiborga olgan holda To‘rtko‘l tumani prokuroriga tergovga qadar tekshiruv o‘tkazish, voqealarga huquqiy baho berish va bolalarning huquqlari va sog‘lig‘ini himoya qilish bo‘yicha qonuniy choralar ko‘rish topshirildi”, deyiladi bayonotda.

Sohiba Komilovna