Қорақалпоғистондаги боғчада болаларга яроқсиз овқат берилганмиди?  Расмий муносабат билдирилди

Аввал хабар берганимиздек, ижтимоий тармоқларда Қорақалпоғистон Республикасидаги боғчалардан бирида сифатсиз ва яроқсиз маҳсулотлардан овқат тайёрланиши айтилган видеомурожаат тарқалган эди. Бунга  Қорақалпоғистон Республикаси Жўқорғи Кенгеси томонидан расмий муносабат билдирилди. 

Қайд этилишича, Жўқорғи Кенгес раиси Аманбай Оринбаев топшириғи билан Тўрткўл тумани 8-сонли мактабгача таълим ташкилоти (МТТ)ни тўсатдан текшириш бошланган. Оринбаевнинг ўринбосари Рустам Турсинбаевич Сапарбаев бошчилигидаги ишчи гуруҳ ушбу боғчага огоҳлантиришсиз борган. Шунингдек, Тўрткўл тумани ҳокими, туман прокурори, туман СЭС бошлиғи ва мактабгача таълим бўлими бошлиғи ҳам боғчага таклиф қилинган.

Ишчи гуруҳ томонидан болалар хоналари, ухлаш шароитлари, биноларни иситиш, санитария иншоотлари, ошхона ва озиқ-овқат омбори текширилган. 8- сонли МТТ мудири Айша Маматкаримова ҳамда боғча ходимлари билан суҳбат ўтказилган. 

Ўрганиш натижасида қуйидагилар аниқланган:

“2022 йил 28 ноябрда ўзларини блогерлар деб таништирган бир гуруҳ шахслар ҳеч қандай қонуний асосга эга бўлмаган ҳолда ва Вазирлар Маҳкамасининг 2019 йил 25 апрелдаги 352-сонли қарорида назарда тутилган мактабгача таълим муассасаларини жамоатчилик назорати тартибига риоя этмасдан, Тўрткўл туманидаги 8-сонли мактабгача таълим муассасаси ҳудудига бостириб киришган. Мантиқий санитария-эпидемиология меъёрлари ва жамиятдаги хулқ-атвор меъёрларига риоя этмаган ҳолда, улар содир бўлаётган воқеаларнинг моҳиятини тушуниш қийин бўлган бир нечта видеоларни суратга олишган ва ошхонани тарк этишни талаб қилган 8-сонли мактабгача таълим муассасаси ходимлари билан жанжаллашишган”, дейилади расмий маълумотда.

Таъкидланишича, ушбу видеолар кейин ижтимоий тармоқларда тарқатилган.

Вазиятни ўрганиш жараёнида илгари боғча кейтеринг хизматларидан фойдаланганлиги, аммо ота-оналардан сифатсиз озиқ-овқат таъминоти билан боғлиқ шикоятлар келиб тушганлиги, шунингдек, овқатлар порциялари белгиланган меъёрларга жавоб бермаганлиги сабабли, етказиб берувчининг хизматларидан воз кечилганлиги аниқланган. 

“Бундан ташқари, бир неча бор 8-сонли мактабгача таълим муассасаси мудирига мактабгача таълим муассасаси хизматларидан воз кечган етказиб берувчига алоқадормиз, деб ўзларини таништирган номаълум шахслар томонидан шантаж билан боғлиқ таҳдидлар келиб тушган”, деб қўшимча қилинган баёнотда.

Айтилишича, боғча раҳбари 2022 йил сентябрь-ноябрь ойлари давомида 4-5 нафар тарбияланувчилар орасида заҳарланиш ҳолатлари бўлганлигини маълум қилган.

СЭС мутахассисларининг фикрига кўра, 4-5 нафар тарбияланувчининг заҳарланиши санитария-эпидемиология меъёрларининг бузилиши ва боғчага сифатсиз озиқ-овқат етказиб бериш натижасида келиб чиққан, деб таъкидлаш мумкин эмас, чунки бу ҳолда тарбияланувчиларнинг оммавий (тарбияланувчилар умумий сонининг камида 85 фоизи) заҳарланиши содир бўлар эди, лекин бундай ҳолат ушбу ташкилотда қайд этилмаган. 

Масъул шахслар билан мулоқот қилгандан сўнг, Рустам Сапарбаев 8-сонли мактабгача таълим ташкилоти тарбияланувчиларининг ота-оналари билан суҳбатлашган. Улар боғча ҳудудига кириб келган шахсларнинг ҳаракатларидан ҳайратдалигини ва ғазабланишларини билдирганлар. Ота-оналар, шунингдек, муассасадаги шароитлардан ва мактабгача таълим муассасаси ходимларининг профессионаллигидан мамнун эканликларини таъкидлашган. Шунингдек, номаълум шахслар МТТ ҳудудига бостириб кирган бундай ҳолатларнинг келгусида олдини олишни сўрашган.

“Манфаатлар тўқнашуви, миллий қонунчиликнинг бошқа бузилишлари билан боғлиқ ҳолатлар бўлиши эҳтимолини эътиборга олган ҳолда Тўрткўл тумани прокурорига терговга қадар текширув ўтказиш, воқеаларга ҳуқуқий баҳо бериш ва болаларнинг ҳуқуқлари ва соғлиғини ҳимоя қилиш бўйича қонуний чоралар кўриш топширилди”, дейилади баёнотда.

Соҳиба Комиловна