Qashqadaryoda ayol kaltaklanib o‘ldirildi

Qashqadaryoda erkak o‘ziga tanish bo‘lgan ayolni kaltakladi. Oqibatda ayol vafot etdi. Bu haqda viloyat Ichki ishlar boshqarmasi ma’lum qildi.

Joriy yilning 1 yanvar kuni Shahrisabz tumanida ayol o‘ziga tanish bo‘lgan qo‘shni qishloqdagi erkak bilan uchrashadi. Ular suhbat davomida o‘zaro janjallashib qolgan.

Qayd etilishicha, o‘sha kuni ayol tanishining g‘ururiga tegadigan gaplar aytgan, erkak bunga chiday olmay ayolni qo‘li bilan urib unga tan-jarohati yetkazgan.

Ayol shifoxonaga olib kelingan, ammo ko‘rsatilgan muolajalarga qaramasdan vafot etgan. Shifokorning so‘zlariga ko‘ra, ayol olib kelinganda tanasi ko‘kargan va shilingan holatda bo‘lgan.

Gumonlanuvchi bu voqeaga qadar biror shubhali harakat qilmagani, oilalar o‘rtasida hech qanday adovat bo‘lmagani aniqlangan.

Holat yuzasidan Shahrisabz tumani tergov bo‘limi tomonidan Jinoyat kodeksining 104-moddasi 3-qismi “d” bandi bilan jinoyat ishi qo‘zg‘atilgan. Gumondorga nisbatan qamoqqa olish ehtiyot chorasi qo‘llanilgan.