Qarindosh-urug‘chilik qilgan Bosh vazirning ukasiga sud hukmi o‘qildi

Ispaniya Bosh vaziri Pedro Sanchesning ukasi David Sanches davlat lavozimiga tayinlanishi bilan bog‘liq nepotizm ishida ma’muriy vakolatlarni suiiste’mol qilishda aybdor deb topildi. Bu haqda sud qaroriga tayanib, “Reuters” xabar berdi.

Qayd etilishicha, Badaxos sudi David Sanchesni 2017 yilda ushbu viloyat hukumatida madaniyat sohasidagi lavozimga tayinlanishi bilan bog‘liq ish bo‘yicha ma’muriy qonunbuzarlikda aybdor deb topgan va uni to‘qqiz yil davomida davlat lavozimlarini egallash huquqidan mahrum qilgan.

Ushbu qaror so‘nggi ikki yil davomida korrupsiya tergovlari va turli mojarolarga duch kelgan sotsialist Bosh vazir Pedro Sanches hukumati uchun navbatdagi siyosiy zarba bo‘ldi. O‘tgan oy Sanchesning sobiq yaqin yordamchilaridan biri alohida korrupsiya ishi bo‘yicha 24 yilga ozodlikdan mahrum etilgan edi.

Tergov ma’lumotlariga ko‘ra, David Sanches Bosh vazir bilan qarindoshlik aloqasi tufayli aynan o‘zi uchun moslashtirilgan lavozimdan manfaat ko‘rganlikda ayblangan. Ushbu lavozim ajratilgan paytda Pedro Sanches endigina muxolifatdagi Sotsialistik partiya rahbari etib saylangan edi. Bosh vazir esa bu ishni o‘ta o‘ng kuchlar tomonidan olib borilayotgan siyosiy kampaniyaning bir qismi sifatida baholagan.

Sud Badaxos viloyati musiqa konservatoriyalarini boshqarish uchun ajratilgan lavozim haqiqiy ma’muriy ehtiyojsiz tashkil etilganini va u asosan David Sanchesning shaxsiy manfaatlariga xizmat qilganini ta’kidlagan.

“Ayblanuvchilar muayyan shaxslarga manfaat yetkazish maqsadida hokimiyat vakolatlarini mutlaqo asossiz tarzda amalga oshirgan”, deyiladi sud qarorida.

Shuningdek, keyinchalik lavozim vazifalari David Sanchesning opera san’atiga qiziqishini hisobga olgan holda o‘zgartirilgani qayd etilgan.

Sud ta’sir o‘tkazish orqali manfaat ko‘rish ayblovini rad etgan. Bu modda bo‘yicha aybdor deb topilganda qamoq jazosi tayinlanishi mumkin edi. O‘ng qanot bosim guruhlari David Sanchesga nisbatan qamoq jazosi talab qilgan bo‘lsa, prokurorlar ishni tugatishni so‘ragan edi. David Sanches sud jarayonida o‘zini aybsiz deb hisoblagan.

Muxolifatdagi Xalq partiyasi matbuot kotibi Ester Munos Pedro Sanchesning iste’foga chiqish vaqti allaqachon kelganini bildirgan. Uning so‘zlariga ko‘ra, sud Bosh vazirning tayinlov jarayoniga aralashganini tasdiqlamagan bo‘lsa-da, ukasi uchun maxsus lavozim yaratilgani tasodif emas.

Hukumat matbuot kotibi Elma Sais Madrid sud jarayonini hurmat qilishini va yuqori instansiya sudlari oxir-oqibat David Sanchesni oqlashiga ishonishini bildirgan. Kataloniyaning mustaqillik tarafdori bo‘lgan ERC partiyasi vakili, Sanchesning ozchilik hukumati ittifoqchisi Gabriel Rufian esa David Sanchesga nisbatan qo‘llangan to‘qqiz yillik taqiqni haddan tashqari og‘ir jaza deb baholagan.

Eslatib o‘tamiz, avvalroq Janubiy Koreyaning sobiq prezidenti Yun Sok Yolning rafiqasi Kim Gon Xi davlat lavozimlariga tayinlov evaziga pora olganlikda aybdor deb topilib, 7 yil muddatga ozodlikdan mahrum etilgan edi.