Isroilda ommaviy oziq-ovqat g‘amlash boshlandi

Tel-Aviv aholisi G‘azo sektori bilan bog‘liq vaziyat keskinlashib borayotgan bir paytda do‘konlardan ommaviy ravishda oziq-ovqat sotib olishni boshladi. Ma’lumotlarga ko‘ra, do‘kon peshtaxtalarida non, sut, tuxum va don kabi mahsulotlar kamayib bormoqda.

Ba’zi savdo joylarida esa mahsulotlar kishi boshiga taqsimlab sotilmoqda – masalan, bir kishi uchun bitta qadoqdan ko‘p bo‘lmagan sut kabi.

Mamlakatda ayni damda taqchillashib borayotgan oziq-ovqat mahsulotlariga non, tuxum, sut, suv, makaron va guruch kabi oziq-ovqat mahsulotlari kiradi. Bundan tashqari, sabzavot va mevalarga ham talab oshib boryapti.

Eslatib o‘tamiz, 7 oktyabr kuni ertalab G‘azo sektoridan Isroil hududiga raketa hujumi boshlangandi. Keyinchalik HAMAS harakati Isroilga qarshi “Al-Aqso to‘foni” harbiy operatsiyasi boshlaganini e’lon qildi.

So‘nggi ma’lumotlarga ko‘ra, G‘azo sektoridan uyushtirilgan hujumdan so‘ng halok bo‘lgan isroilliklar soni 600 dan oshgan, 2000 dan ortiq kishi jarohat olgan.