Isroil qo‘shinlari sharqiy Xon Yunusni tark etdi

Minglab falastinliklar bugun, 30 iyul kuni Isroil qo‘shinlari bir hafta davom etgan bosqinini tugatgandan so‘ng G‘azo sektori janubidagi Xon Yunus shahri vayronalaridagi uylariga qaytdi. Bu haqda “Reuters” xabar berdi.

Falastinlik qutqaruvchilar va tinch aholi tashlandiq urush zonasi ko‘chalaridan jasadlarni yig‘ib, gilamlarga o‘ralgan jasadlarni mashinalar va eshak aravalarida o‘likxonalarga olib borishdi. HAMASning G‘azodagi matbuot xizmati Isroilning Xon Yunus sharqidagi sakkiz kunlik reydida 255 falastinlik halok bo‘lgani va 300 dan ortiq kishi yaralanganini bildirdi. Kamida 30 kishi hamon bedarak yo‘qolgan.

Isroil harbiylari esa bir hafta davom etgan reyd davomida o‘z kuchlari “150 dan ortiq falastinlik jangarilarni yo‘q qilganini, jangarilar tunnellarini vayron qilganini va qurol-yarog‘larni qo‘lga olgani”ni aytdi.

Isroil askarlari ketganidan so‘ng odamlar uylariga piyoda va aravalarda o‘z buyumlari bilan qaytishdi. Ko‘pchilik o‘z uylari buzilgan yoki vayron bo‘lganini aniqladi.

Guvohlarning aytishicha, armiya bo‘linmalari reydning asosiy nishoni bo‘lgan Xon Yunusning sharqiy chekkasida joylashgan Bani Suhayladagi asosiy qabristonni, shuningdek, yaqin atrofdagi uylar va yo‘llarni o‘qqa tutgan.

Oylardan beri davom etayotgan vositachilar orqali sulh bo‘yicha muzokaralar olib borish harakatlari yana muvaffaqiyatsizlikka uchradi. Kecha, 29 iyul kuni Isroil va HAMAS bir-birini muzokaralarda taraqqiyot yo‘qligida ayblashdi. HAMAS G‘azodagi urushni yakunlash uchun o‘t ochishni to‘xtatishni istasa, Isroil Bosh vaziri Binyamin Netanyaxu mojaro HAMAS mag‘lub bo‘lgandan keyingina tugashini aytmoqda. Kelishuv qanday amalga oshirilishi borasida ham kelishmovchiliklar mavjud.