Isroil G‘arbiy Sohilni anneksiya qilmoqchi – Falastin 

Falastin Tashqi ishlar vazirligi Isroilning yaqinda “bosqin ostidagi G‘arbiy Sohil” o‘rniga “Iudeya va Samariya” atamalarini rasman qo‘llash qarorini qoralab, buni mintaqani anneksiya qilishga qaratilgan “xavfli eskalatsiya” deb atadi. Bu haqda Falastin Tashqi ishlar vazirligi bayonotida so‘z boradi.

Hisobotga ko‘ra, Isroilning xatti-harakatlari jiddiy xavf tug‘diradi va bosib olingan Falastin hududlarini anneksiya qilishni qonuniylashtirishga urinishdir. Vazirlik qonun loyihasini “Isroilning bir tomonlama va noqonuniy harakatlarining xavfli avj olishi, G‘arbiy Sohilni anneksiya qilishni yakunlash va ishg‘ol qilish yo‘li bilan mintaqaga Isroil qonunlarini joriy etishga urinish” deb ta’riflagan.

Vazirlik bu harakatni haqiqatda Falastin davlatini barpo etish va mojaroni tinch siyosiy yo‘l bilan hal qilish imkoniyatini tizimli ravishda sabotaj qilish sifatida baholadi.

“Isroil G‘arbiy Sohilni o‘z ichiga qo‘shib olish hamda uni Yahudiya va Samariya deb atash niyatida. Bu qonun loyihasi va boshqa ishg‘ol harakatlari Isroilga Falastin hududlariga hech qanday huquq bermaydi; Ular haqiqiy emas, noqonuniy hamda xalqaro huquq va BMT rezolyutsiyalarini ochiqdan-ochiq buzadi. Shuningdek, ular mintaqa va dunyo xavfsizligi va barqarorligiga aniq tahdid solmoqda”, deyiladi bayonotda.

Falastin Tashqi ishlar vazirligi Isroilning “Falastin davlatining siyosiy, huquqiy va geografik voqeligini o‘zgartirish”ga urinishlarini to‘xtatish uchun shoshilinch xalqaro aralashuvga chaqirdi. 

Isroilning KAN davlat teleradiokompaniyasining xabar berishicha, qonun loyihasi 12 fevral kuni parlamentning yalpi majlisiga olib chiqilishi kutilmoqda.

Falastin va isroillik so‘lchilarning aytishicha, Bosh vazir Binyamin Netanyaxu hukumati G‘arbiy Sohilda Isroil qonunlarini joriy qilishga va mintaqani anneksiya qilishga urinmoqda. So‘nggi oylarda Isroil hukumatining ko‘plab vazirlari, jumladan Netanyaxu G‘arbiy Sohilni Isroilga qo‘shib olish niyatlarini ochiqchasiga e’lon qildi.