Isroil HAMAS yetakchisining “lokatsiya”si uchun katta mukofot e’lon qildi – OAV 

Isroil mudofaa kuchlari HAMASning G‘azo sektoridagi yetakchisi Yahyo Sinvarning qayerda ekani haqidagi ma’lumot uchun 400 ming dollar mukofot puli taklif qiladi. Bu haqda “The Times of Israel” gazetasi xabar berdi.

Ijtimoiy tarmoqlarda shu haqdagi varaqalarning fotosuratlari e’lon qilindi. Qayd etilishicha, nashr ularning haqiqiyligini tasdiqlay olmadi. Biroq, varaqalarda telefon raqami, tegishli ma’lumotlarni maxfiy ravishda taqdim etish mumkin bo‘lgan Telegram-manzil keltirilgan.

Varaqada, shuningdek, harakatning janubiy brigadasiga rahbarlik qilayotgan, HAMAS yetakchisining ukasi Muhammad Sinvar haqidagi ma’lumot uchun 300 ming dollar mukofot puli ham ko‘rsatilgan. Bundan tashqari, mukofot taklif etilayotgan shaxslar ro‘yxatiga Xon Yunus shahridagi HAMAS bataloni qo‘mondoni Rafa Salame (200 ming dollar) va harakatning harbiy qanotining yana bir yetakchisi Muhammad ad-Deif (100 ming dollar) ham kiritilgan. 

Ma’lumotlarga ko‘ra, Isroil bir necha yillardan beri Salameni qidiradi. 2021 yilda SAXAL uning G‘azodagi uyini raketa zarbasi bilan vayron qilgan.

Ad-Deifni esa Isroil razvedka xizmatlari 25 yildan ortiq vaqtdan beri qidirmoqda. Gazetaning yozishicha, u bir nechta teraktlarni rejalashtirish va amalga oshirishda gumon qilinmoqda.

"Isroil bir necha yil davomida ad-Deifni o‘ldirishga kamida yetti marta urindi. Birinchi urinish 2001 yilda bo‘lib o‘tgan, ikkinchi urinish esa 2002 yilda sodir bo‘lgan va u bir yildan so‘ng uchinchi urinishda ham omon qola olgan. 2006 yilda u portlashda og‘ir yaralangan, biroq ikkala oyog‘i va qo‘lidan ayrilgan holda tirik qolgan. 2014 yilda o‘sha yili bo‘lib o‘tgan G‘azo urushi paytida Isroil yana ad-Deifni yo‘q qilishga urinib ko‘rdi, biroq qo‘lidan kelmadi, uning o‘rniga xotini, yangi tug‘ilgan o‘g‘li va uch yoshli qizi o‘ldirildi”, deb yozadi “The Times of Israel”.

Eslatib o‘tamiz, oldinroq “The Wall Street Journal” Isroil razvedka xizmatlari G‘azodagi operatsiya yakunlanganidan so‘ng butun dunyo bo‘ylab HAMAS yetakchilarini kuzatib borish va yo‘q qilishga tayyorlanayotganini xabar qilgandi.