Ipoteka krediti berish tartibida o‘zgarish bo‘ldi

O‘zbekiston Prezidentining “Ipoteka krediti mexanizmlari yanada takomillashtirilishi munosabati bilan O‘zbekiston Respublikasi Prezidentining ayrim hujjatlariga o‘zgartirish va qo‘shimchalar kiritish to‘g‘risida”gi PF-6274-son farmoni qabul qilindi.

Birinchidan, Prezidentning 2019 yil 28 noyabrdagi PF-5886-son Farmonida 2020 yilda qishloq joylarda va shaharlarda yangi tartibga muvofiq ko‘p kvartirali uy-joylar qurish va subsidiyalar to‘lashning maqsadli mo‘ljallari (1, 2-ilovalar) yangi tahrirda tasdiqlandi.

Ikkinchidan, Prezidentning 2021 yil 11 martdagi PF-6186-son Farmonida quyidagilar yangi tahrirda tasdiqlandi:

• 2021 yilda yangi tartib doirasida ipoteka kreditlari va ipoteka kreditlari bo‘yicha subsidiyalar ajratishning maqsadli parametrlari (1, 2-ilovalar);
• 2021 yil uchun uy-joylarning hisoblangan qiymati, bir qarz oluvchiga ajratiladigan ipoteka krediti va ipoteka krediti bo‘yicha dastlabki badalning bir qismini qoplash uchun Davlat byudjetidan ajratiladigan subsidiyalarning eng ko‘p miqdori (3-ilova).

Shuningdek Osiyo taraqqiyot banki mablag‘lari hisobiga “Qishloq qurilish invest IK” MCHJ ishtirokida qishloq joylarda qo‘shimcha ko‘p qavatli arzon uy-joylar qurishning maqsadli parametrlari (41-ilova) tasdiqlandi.

2-band 5, 6-xatboshilar bilan to‘ldirildi. Ularga muvofiq 2021 yil 1 oktyabrga qadar qurilishi yakunlanib, foydalanishga tayyor holda topshirilgan kvartiralarni sotib olish uchun ajratiladigan ipoteka kreditlari bo‘yicha subsidiyalar sotib olinayotgan kvartiraning maydoni va narxi mazkur Farmonning 3-ilovasida keltirilgan kvartira maydonining eng ko‘p me’yori va uy-joyning hisoblangan qiymatidan oshgan taqdirda ham to‘lanadi. Bunda sotib olinadigan kvartiraning narxi uy-joyning hisoblangan qiymatidan oshib ketgan taqdirda, qiymatning qolgan qismi qarz oluvchi tomonidan o‘z mablag‘lari va qonun hujjatlarida taqiqlanmagan boshqa manbalar hisobidan to‘lanadi.

Prezidentning 2019 yil 28 noyabrdagi PF-5886-son Farmoni 4-bandi 3-xatboshisi hamda Prezidentning 2021 yil 11 martdagi PF-6186-son Farmoni 1-bandi 5-xatboshisiga muvofiq uy-joylarning hisoblangan qiymati har yili Iqtisodiy taraqqiyot va kambag‘allikni qisqartirish vazirligi tomonidan Moliya vazirligi hamda Qurilish vazirligi bilan kelishgan holda belgilanadi va har 6 oyda qayta ko‘rib chiqiladi.

Shuningdek boshqa o‘zgartirish va qo‘shimchalar ham kiritilgan.