“Humo Arena”da tantana: Mirziyoyev Navro‘z bayramini nishonlayotgan xalqlarni tabrikladi

Toshkent shahridagi “Humo Arena” majmuasida 21 mart kuni Navro‘z bayrami shodiyonasi bo‘lib o‘tdi. Tantanali tadbirda O‘zbekiston Respublikasi Prezidenti Shavkat Mirziyoyev ishtirok etdi. Bu haqda Prezident Matbuot xizmati xabar berdi.

Davlat rahbari ko‘p millatli o‘zbek xalqini Navro‘z bayrami bilan tabriklab, ezgu tilaklar bildirdi.

“O‘tgan yili pandemiya tufayli Navro‘z bayramini har doimgidek katta tantana qilib, keng nishonlay olmagan edik. O‘shanda, bu tashvishli kunlar albatta ortda qoladi, hali ko‘p to‘y-tomosha va sayillarni xalqimiz bilan birgalikda o‘tkazamiz, deb ezgu niyat qilgan edik. Bugun ana shu orzu va intilishlarimiz ro‘yobga chiqmoqda. Go‘zal va jonajon yurtimizda yana shodiyonalar, quvonchli kunlar boshlanmoqda”, deydi Shavkat Mirziyoyev.

Qayd etilishicha, Prezident koronavirus balosi hali to‘la bartaraf bo‘lmaganini, shuncha mehnat zoye ketmasligi uchun pandemiyaga qarshi kurashishni bir lahza ham to‘xtatmaslik, beparvolik va beg‘amlikka berilmaslik kerakligini ta’kidlagan.

“Bizning kuchimiz – birlik va ahillikda, bizning qudratimiz – mehr-oqibat, o‘zaro ko‘mak va saxovatda, bizning yutug‘imiz – ertangi kunga bo‘lgan yuksak ishonchimizda”, deydi Prezident.

Bu yilgi Navro‘z O‘zbekiston mustaqilligining 30 yilligida o‘tmoqda.

“Navro‘zning o‘lmas ruhi va boqiy falsafasi biz bugun bunyod etayotgan yangi O‘zbekiston g‘oyasi bilan uyg‘un va hamohangdir. Xalqimizning fidokorona mehnati, qat’iy siyosiy irodamiz bilan keng ko‘lamli islohotlarimizni bundan keyin ham jadal davom ettiramiz. Qanchalik qiyin bo‘lmasin, el-yurtimiz manfaatini, jondan aziz farzandlarimiz kelajagini ta’minlashga xizmat qiladigan to‘g‘ri yo‘limizdan hech qachon ortga qaytmaymiz”, deya ta’kidladi Shavkat Mirziyoyev.

Davlat rahbari Navro‘z bayramini nishonlayotgan barcha xalqlarga, xorijiy hamkorlarga ezgu tabrik va salomlarini yo‘lladi.

Bayram tadbiri katta konsert dasturi bilan yakunlandi.