Gulnora va Lola Karimovaning qizlari bobosi qabrini ziyorat qildi

O‘zbekiston Respublikasining Birinchi Prezidenti Islom Karimovning nabiralari Imon (Gulnora Karimovaning qizi) va Maryam (Lola Karimova-Tillyayevaning qizi) bobosining qabrini ziyorat qilish uchun Samarqandga bordi. Bu haqda ular Instagram’dagi sahifalarida yozib qoldirgan.

“Samarqand men uchun alohida shahar. U tarix, madaniyat, san’at, ana’analarga boy. O‘zim uchun uzoq va mashaqqatli vaqtlardan so‘ng Samarqandga ilk bor kelganimda shu zahotiyoq bu yerning o‘ziga xos muhitiga oshiq bo‘ldim.

Bobom menga bu go‘zal shahar, o‘zi ulg‘aygan go‘zal yerlar haqida, har kuni Registondan o‘tib maktabga qanday borgani haqida gapirib berardi. U tarixga juda qiziqardi va men u kabi tafsilotlariga xotirlab qoladigan odamni hech qachon uchratmaganman. U bilardi va bilim almashishni yaxshi ko‘rardi, eng muhimi, uni tinglash har doim qiziqarli edi.

Har safar O‘zbekistonga kelganimda bu yerga qaytaman. Bu yerda o‘zimni xavfsiz va iliq his qilaman. Samarqand ko‘chalari bo‘ylab sayr qilsam, uning kichkinaligi qanday bo‘lganini doimo tasavvur qilaman va uning barcha hikoyalarini eslayman”, degan Imon Karimova.

Lola Tillyayevaning qizi Maryam esa hayajonda ekanini yashirmagan holda, o‘z hissiyotlari bilan qanday o‘rtoqlashishga ham qiynalayotganini aytib o‘tgan.

“Ko‘pdan beri Samarqandga kelishni, bobomni ko‘rishni orzu qilardim. U eng g‘amxo‘r bobo edi va men uni hozir juda sog‘indim. Men uchun bu sayohat katta ahamiyatga ega, chunki bir-ikki haftadan keyin bobomning tug‘ilgan kuni bo‘lishi kerak edi. Ilk bor uni ziyorat qilish va Imon bilan birga gul qo‘yish imkoniga ega bo‘lganimdan minnatdorman. Maqbarada uning quvvati va borligi juda kuchli seziladi.

Maqbaraning o‘zi UNESCO merosi ro‘yxatiga kiritilgan qadimiy Hazrati Xizr masjidi majmuasida joylashgan. Masjid haqida birinchi eslatma arablarning So‘g‘dni bosib olish davriga (VIII asr boshlari) tegishli.

Kirish qismidagi marmar plitaga “Bu muqaddas dargoh O‘zbekiston Respublikasining Birinchi Prezidenti, buyuk davlat va siyosat arbobi, o‘zbek xalqining aziz va suyukli farzandi Islom Abdug‘aniyevich Karimovning mangu maskanidir” deb yozilgan”, deya o‘z fikrlari bilan o‘rtoqlashgan Maryam Tillyayeva.

Avvalroq, Islom Karimovning ikki qiz nabirasi 8 yil deganda ilk bor uchrashgani haqida xabar bergan edik.

Xabaringiz bor, 2013 yilda Gulnora Karimova va unga aloqador shirkatlar bilan bog‘liq muammolar boshlangandan so‘ng Gulnora Karimova va uning qizi hech qayerda ko‘rinish bermadi. Hatto, Prezident Karimovning dafn marosimi ham ularsiz o‘tdi. Xalqaro darajadagi qabul marosimida oila nomidan Islom Karimovning rafiqasi Tatyana Karimova va qizi Lola Karimova ishtirok etdi. 

Birinchi Prezident Islom Karimovning o‘limidan bir yil o‘tib, Imon Karimova ham oila a’zosi sifatida 31 avgust kuni Oqsaroy majmuasida o‘tkazilgan xotira marosimida xolasi Lola Karimova-Tillyayeva bilan ishtirok etdi. Uning akasi Islom Karimov esa onasi hibslangandan keyin Toshkentda ko‘rinish bermagan. 

2018 yilning oktyabr oyiga kelib, Imon Karimova ijtimoiy tarmoqlar orqali “Xolangiz bilan aloqangiz bormi?”, deya yo‘llangan savolga, qo‘l siltab javob berib, munosabatlari uzilganini oshkor qilgan edi. 

2016 yilda Gulnora Karimovaning o‘g‘li Islom Karimov BBC’ga intervyu berib, onasi va xolasining munosabatlari hali ancha yillar avval buzilganini aytib, bunda bobosini ayblagandi. 

“Oyim va singlisi orasida yoshliklarida normal munosabatlar bo‘lib kelgan. Yagona muammo shuki... Men bunda ko‘proq bobomni ayblayman. Chunki oyim matematika maktabini oltin medal bilan bitirgan. Bobomning izidan borgan. Oyim sport bilan shug‘ullangan, qora kamar olgan. O‘z karerasini qurishni boshlagan. U nima qilsa, xolam buni takrorlashni istagan. Lekin, nega? O‘ylaymanki, sababi – bobom butun umr xolamga gapirgan “Nega opangga o‘xsholmaysan? Nega mana buni qilolmaysan? Nega yaxshi o‘qimaysan? Nega “U” bo‘lolmaysan?”

Men o‘z qizlaringga bunday munosabat qilish noto‘g‘ri deb bilaman. Shuning uchun, bu uning aybi deb o‘ylayman. Lekin, fakt shuki, bu unga ta’sir qilgan. Xolam butun umr buni eshitgani uchun, unda kompleks paydo bo‘lgan. Mana hozir jamg‘arma tuzilibdi. Mamlakatda hamma biladiki, bizda jamg‘arma allaqachon bor edi. Jurnal ham bor edi, u ham jurnal chiqaryapti. Buni isbotlashga ham hojat yo‘q. Butun umr o‘zaro poyga bo‘lgan. Xolam ham nimalargadir qodir ekanini ko‘rsatishga intilgan. O‘ylashimcha, nafrat shunday paydo bo‘lgan, chunki xolam baribir oyim darajasiga chiqa olmagan. Bular keyin ko‘pirib jismoniy muammoga aylangan. Boshida bu faqat hissiyotlar darajasida bo‘lgan bo‘lsa, hozir bu hayotimizda aks etyapti. Bu adovat tufayli oilalar barbod bo‘lyapti”, degan edi kichik Islom Karimov. 

Gulnora Karimova hibslangach, uning o‘g‘li va qizi Londonga ko‘chib o‘tdi. Bu orada Imon bir necha bor O‘zbekistonga keldi. 2020 yilda buvisi Tatyana Karimova bilan ham uchrashib, bobosining Oqsaroy qarorgohidagi kabinetida bo‘ldi. Islom esa O‘zbekistonga qadam bosmadi va Londonda uylandi. Kuni kecha u farzandli bo‘lganini e’lon qildi. 50 yoshni qarshilash arafasida turgan Gulnora Karimova esa hamon qamoqda qolmoqda. 

2016 yildan keyin Lola Karimova turmush o‘rtog‘i va farzandlari bilan AQSHga ko‘chib o‘tdi. U AQSHdan turib “Sen yolg‘iz emassan” xayriya jamg‘armasi va Islom Karimov nomidagi Respublika jamoat fondini yuritmoqda. Shuningdek, “The harmonist” attorlik mollari brendiga ham asos solgan. 

Lola Karimovaning qizi Maryam Tillyayeva o‘tgan yilning o‘rtalaridan boshlash jamoatchilik og‘ziga tushgan. U rossiyalik bloger Amiran Sardarovga turmushga chiqdi. Ayni vaqtda Moskvaga ko‘chib o‘tgan. Bundan bir necha oy avval ijtimoiy tarmoqlarda uning noqabul ko‘rinishdagi surati paydo bo‘ldi. Buni jamoatchilik faollari bobosining xotirasiga hurmatsizlik sifatida baholadi. Lola Karimova esa qizining xatti-harakatlarini Islom Karimovning prezidentlik faoliyati va g‘oyalari bilan bog‘lamaslikni so‘radi. 

Nabira kuyov Amiran Sardarovning ma’lum qilishicha, ayni vaqtda qaynota-qaynonasi ular bilan aloqani uzgan. Ular Maryamning kuyov borasidagi tanloviga bosh-boshidan qarshi chiqqan.