Germaniya Rossiya va Xitoyning yangi harbiy tahdididan ogohlantirdi

Germaniya Mudofaa vazirligi Rossiya va Xitoyning yangi harbiy salohiyati tufayli o‘sib borayotgan xavf haqida ogohlantirdi. Bu haqda Germaniyaning “Welt am Sonntag” nashri xabar bermoqda.

Ma’lumotlarga ko‘ra, Moskva 6375 yadroviy kallakka ega va uning maqsadlari NATOni “beqarorlashtirish va zaiflashtirish”ga qaratilgan.

Germaniya Mudofaa vazirligi 840 ming rus askarlari yaxshi tayyorgarlikdan o‘tgan va ularni tezda joydan joyga ko‘chirish mumkin, deb hisoblaydi.

“Rossiyaning odatdagi qurolli kuchlari ma’lum bir hududda qisqa vaqt ichida ustunlikka erishishga qodir”, deyiladi xabarda. Mutaxassislar zaif tomonlarni global miqyosdagi cheklangan imkoniyatlar va hujum dronlarining yetishmasligi bilan izohladilar.

Nashrning qayd etishicha, Rossiya uchun qurolli kuchlar siyosiy hokimiyat vositasidir.

Shunga qaramay, vazirlikning xulosalaridan birida shunday deyilgan: “Xitoy global ta’sir doirasi, shu jumladan qurol sotish va harbiy hamkorlik bo‘yicha Rossiyadan tobora ortda bormoqda”.

O‘tgan yilning noyabr oyida Germaniya Mudofaa vazirligi rahbari Bundestagda so‘zga chiqib, qurolsizlanish bo‘yicha Rossiya bilan kuchli pozitsiyadan muzokaralar olib borishga chaqirgandi. Vazirlik rahbari Annegret Kramp-Karrenbauerning ta’kidlashicha, “bu Germaniya tashqi siyosatida doimo yaxshi pozitsiya bo‘lib kelgan va kelajakda ham shunday bo‘lishi kerak”. Bungacha u Rossiyani agressiyada va boshqa davlatlarning huquqlarini mensimaganlikda ayblagan.