FVV tezkor axborot bilan chiqdi

Favqulodda vaziyatlar vazirligi (FVV) O‘zgidrometga tayanib, joriy yilning 28 martidan 2 apreligacha kutilayotgan yog‘ingarchilik hamda havo haroratining o‘zgarishlari sababli respublikaning tog‘li hududlarida qor ko‘chish xavfini e’lon qildi.

Unga ko‘ra:

• Qashqadaryo viloyati: Dehqonobod, Kitob, Qamashi, Shahrisabz tumanlarida;
• Surxondaryo viloyati: Boysun, Qumqo‘rg‘on, Sariosiyo, Uzun tumanlarida;
• Samarqand viloyati: Nurobod, Qo‘shrabot, Samarqand, Urgut tumanlarida;
• Jizzax viloyati: Baxmal, Zomin tumanlarida;
• Toshkent viloyati: Bo‘stonliq, Parkent, Ohangaron tumanlari (Chotqol tizmasi tog‘lari);
• Namangan viloyati: Pop tumanida qor ko‘chish xavfi e’lon qilindi.

“Tog‘li va tog‘oldi hududlarda istiqomat qiluvchi aholi, dam olish maskanlarida dam oluvchilar va ushbu hududlarda harakatlanuvchi haydovchilardan ehtiyotkorlik choralarini ko‘rishni so‘raymiz”, deyiladi FVV xabarida.

Eslatib o‘tamiz, O‘zgidromet 21 – 27 mart kunlari ayrim hududlarda qor ko‘chish xavfini e’lon qilgan edi.