Futzal: Osiyo kubogining amaldagi g‘olibi turnirni tark etdi

Ayni kunlarda Tailandda futzal bo‘yicha Osiyo kubogi bahslari o‘tkazilmoqda. Bugun, 22 aprel kuni guruh bosqichi 3-turi doirasida turnirning amaldagi chempioni Yaponiya qo‘shni Tojikiston bilan kuch sinashib, 1:1 hisobidagi durangga imzo chekdi.

Dastlab 11-daqiqada “kunchiqar yurt” vakili Ishida hisobni ochgan bo‘lsa, 25-daqiqada tojikistonliklardan Muhammadjon Sharipov hisobdagi muvozanatni tikladi.

Shunday qilib, Yaponiya “C” guruhida 4 ochko jamg‘argan holda musobaqa bilan xayrlashadigan bo‘ldi. Endi “samuraylar” shu yili O‘zbekistonda o‘tadigan Jahon chempionatida ham ishtirok etolmaydi. Mazkur guruhdan 1-turda Yaponiyani sensatsion tarzda mag‘lubiyatga uchratgan Qirg‘iziston va bugun “samuraylar” bilan durang o‘ynagan Tojikiston pley-off yo‘llanmasini qo‘lga kiritdi. Kvartetda 4-o‘rinni janubiy koreyalik futzalchilar band etdi.

Eslatib o‘tamiz, avvalroq O‘zbekiston futzal terma jamoasining chorak finaldagi raqibi aniq bo‘lgani xabar qilingandi.