Floridada suv quvuridan alligator topildi (video)

Florida shtatining Ovedo shahridagi suv quvuridan uzunligi 1,7 metrlik alligator topildi. Bu haqda BBC xabar berdi. 

Keltirilishicha, Florida shtatining Ovedo shahrida bir qator chuqurliklar aholiga muammoli vaziyat tug‘dirgani sababli, shahar mutaxassislari yo‘l ostidagi “anomaliyalarni” tekshirish uchun robot kamerani suv quvurining ichiga tushirgan. Tasvirda kutilmaganda uzunligi 5 fut, ya’ni 1,7 metrlik alligatorni ko‘rgan ishchilar hayratda qolgan.

Ekranda notanish jonivorning ikkita kichik ko‘zlari porlab turgan edi. Avvaliga ishchilar uni qurbaqa deb o‘ylagan, ammo videotasvirni yaqinlashtirib, yana takroran ko‘rilganda alligatorning uzun dumi yaqqol ko‘zga tashlangan. So‘ngra Ovedo shahri rasmiylari jonivorni quvurlar orqali robot-kamera yordamida kuzatgan.

“Baxtimizga bizning ekipajlarimizda robot bor”, deydi mutaxassislar.

Voqeadan so‘ng mahalliy aholi quvurlarga tushmaslikdan ogohlantirilgan.

Sevara Azimova