Feruza Najmiddinova “QALAMPIR” MCHJ direktori o‘rinbosari lavozimiga tayinlandi

Bugun, 31 iyul kuni QALAMPIR.UZ’da tayinlovlar amalga oshirildi. Unga ko‘ra, jurnalist Feruza Najmiddinova “QALAMPIR” MCHJ direktori o‘rinbosari lavozimiga tayinlandi. 

QALAMPIR.UZ internet nashri muassisi “QALAMPIR” MCHJ ta’sischilari tomonidan o‘tkazilgan navbatdagi yig‘ilishda tahririyatning 2023 yil birinchi yarim yillikdagi faoliyati, yutuq va kamchiliklari atroflicha tahlil qilindi, mas’ul muharrirlarning hisoboti tinglandi. Yangi loyihalar bo‘yicha takliflar eshitildi, jurnalistlar, texnik xodimlarning malakasini oshirish masalasiga alohida to‘xtalib o‘tildi.

O‘tgan davr mobaynidagi yutuqlari, tashkiliy masalalardagi faolligi va jamoada tutgan o‘rnidan kelib chiqib, Bosh muharrir o‘rinbosari lavozimida ishlab kelayotgan Feruza Najmiddinovani “QALAMPIR” MCHJ direktori o‘rinbosari lavozimiga tavsiya etildi. Nomzod ta’sischi va tahririyat xodimlari tomonidan qo‘llab-quvvatlandi. 

Feruza Murodulla qizi Najmiddinova 1992 yil Toshkent shahrida tug‘ilgan. Millati – o‘zbek. Ma’lumoti – oliy. 2011-2015 yillarda O‘zbekiston davlat san’at va madaniyat instituti bakalavriatini, 2015-2017 yillarda magistraturasini tamomlagan. 

U 2019 yilning mart oyida QALAMPIR.UZ internet nashri muxbiri sifatida faoliyat boshladi. 2021 yildan buyon Bosh muharrir o‘rinbosari lavozimida ishlab kelayotgan edi.