Farg‘onada mudhish YTH: 4 kishi vafot etdi

Joriy yilning 1 noyabr kuni Farg‘ona viloyatida “Jiguli” va Nexia-2 ishtirokida yo‘l transport hodisasi yuz berdi. Oqibatda to‘rt kishi vafot etdi va 3 kishi jarohatlandi. Bu haqda viloyat Yo‘l harakati xavfsizligi Matbuot xizmati QALAMPIR.UZ’ga xabar berdi. 

Qayd etilishicha, voqea soat 22:00 atrofida viloyatning Furqat tumani Qo‘qonboy qishlog‘i hududidan o‘tuvchi A-376 Qo‘qon–Jizzax avtomobil yo‘lining 10-kilometrida sodir bo‘lgan. 29 yoshli N.D. boshqaruvidagi Nexia-2 avtomobili qarama-qarshi yo‘nalishga chiqib, 36 yoshli Yu.M. boshqaruvidagi VAZ-2105 (“Jiguli”) avtomobili bilan to‘qnashgan. 

Oqibatda Nexia-2 haydovchisi N.D. va yo‘lovchisi R.O. tan jarohati olib, hodisa joyida, yana ikki yo‘lovchi – R.K. va M.G‘. esa shifoxonada vafot etgan. VAZ-2105 avtomobili haydovchisi va ikki nafar yo‘lovchi Furqat tumani shifoxonasining jonlantirish bo‘limiga yotqizilgan.