Farg‘onada 4 qavatga mo‘ljallangan turar joy binosi 7 qavat qilib qurildi

Ijtimoiy tarmoqlarda Farg‘ona shahrining Registon ko‘chasida joylashgan turar joy binosi rejaga ko‘ra 4 qavat emas, 7 qavat qilib qurilayotgani haqida xabarlar tarqaldi. Holat yuzasidan Qurilish va uy-joy kommunal xo‘jaligi vazirligi munosabat bildirdi.

Buyurtmachi H.L. tomonidan qurilayotgan Registon ko‘chasidagi bo‘sh yer maydonidagi to‘rt qavatli turar joy binosi, avtoturargoh, bolalar maydonchasi qurish hamda tutash hududni obodonlashtirish va ko‘kalamzorlashtirish ob’ekti inspeksiyadan 2018 yil ro‘yxatdan o‘tgan. Qurilish ishlari boshlangan, ob’ektda inspeksiya tomonidan doimiy nazorat ishlari olib borilgan.  

Qayd etilishicha, turar-joy binosining loyiha hujjatlarida to‘rt qavat qurish belgilangan, amalda esa yetti qavat qilib qurilgan. Ushbu ob’ektning 5, 6, 7-qavatlarini qurish uchun pastki qavatlarni yuk ko‘tarish qobiliyatini o‘rganish bo‘yicha “Inspection Work” tomonidan tayyorlangan texnik xulosaga asosan yuqori qavatlarni yengil qurilish materiallaridan bajarishga tavsiya etilgan. 

Lekin, buyurtmachi H.L. va pudratchi “Ikat Vodiy” mas’uliyati cheklangan jamiyati tomonidan ushbu xulosaga asosan loyiha hujjatlari qayta to‘liq ishlab chiqilmagan. Shuningdek, belgilangan tartibda ekspertizadan o‘tkazilmagan hamda inspeksiyaga xabarnoma yuborib,  ro‘yxatdan o‘tmasdan qurilish ishlari amalga oshirilgan. 

Ushbu holat yuzasidan Farg‘ona viloyat qurilish sohasida hududiy nazorat inspeksiyasi tomonidan ob’ekt qurilishini to‘xtatish to‘g‘risida 2022 yil 12 dekabrda yozma ko‘rsatma berilgan. Aniqlangan qonun buzilish holati yuzasidan 2022 yil 26 dekabr kuni Ma’muriy huquqbuzarlik to‘g‘risidagi kodeksning 99-moddasi 7-qismi bilan bayonnoma rasmiylashtirilib, ma’muriy sudga yuborilgan. Bugungi kunda ob’ektda qurilish-montaj ishlari to‘xtatilgan.

Eslatib o‘tamiz, avvalroq Toshkentning Mirzo Ulug‘bek tumanida darz ketgan uyni qurgan pudratchi 8 yil muddatga ozodlikdan mahrum qilingani haqida xabar berilgandi.