Falastinliklarni yoqlagan mashhur ekofaol nomi Isroil o‘quv dasturlaridan o‘chiriladi

Isroil ta’lim muassasalari dasturlaridan o‘z chiqishlari bilan mashhur shvetsiyalik ekofaol Greta Tunberg nomini olib tashlaydi. Bunga uning falastinliklarni qo‘llab-quvvatlovchi bayonotlari sabab bo‘lgan. Bu haqda "The Jerusalem post" xabar berdi.

Unga ko‘ra, Isroil Ta’lim vazirligi Greta Tunberg haqidagi har qanday eslatmani mamlakat o‘quv dasturidan o‘chiradi. Bunga iqlim faolining 20 oktyabr kuni X ijtimoiy tarmog‘ida falastinliklar va G‘azo sektorini qo‘llab-quvvatlash maqsadida chop etgan posti sabab bo‘lgan. 

"Uning qilmishi Greta Tunberg ta’lim va axloqiy jihatdan yoshlarga namuna bo‘la olmasligini anglatadi hamda u endi isroillik talabalarni ilhomlantira olmaydi", deya bayonot bergan vazirlik.

Qizning postidagi suratda u va uning uch nafar tarafdori "Biz G‘azoni qo‘llab-quvvatlaymiz" va boshqa so‘zlar yozilgan plakatlarni ushlab turgani tasvirlangan. 

"Butun dunyo ikki tomonni zudlik bilan o‘t ochishni to‘xtatishga, falastinliklar va jabrlangan barcha tinch aholi uchun adolat va erkinlikka chaqirishi kerak", deyiladi iqlim faolining bayonotida.

Tunbergning Falastinni qo‘llab-quvvatlash haqidagi posti internetda kuchli reaksiyaga sabab bo‘lib, tezda 218 mingga yaqin "layk" to‘plangan.